Xalqımız 12 dekabrı Ulu öndər Heydər Əliyevin anım günü kimi böyük el məhəbbəti, minnətdarlıq hissi ilə qeyd edir. Tarixə öz adını əbədi həkk etmiş nadir şəxsiyyətin, qüdrətli siyasi xadimin həyat və fəaliyyəti hər bir Azərbaycan vətəndaşının qürur mənbəyinə çevrilmişdir. Həmin dahilər öz qətiyyətləri ilə mənsub olduqları xalqı arxasınca aparıb, ən taleyüklü məqamlarda qalib rolu oynamışlar.
Dahi şəxsiyyətin vəfatından 20 il ötür. Bu münasibətlə Ölkəmizin hər yerində olduğu kimi, Sumqayıt şəhərində də əfsanəvi diyarın övladı ulu öndər Heydər Əliyev qürur, hörmət və ehtiramla anılıb. Tədbirdə Sumqayıt şəhər İcra Hakimiyyətinin başçısı Zakir Fərəcov, Millət Vəkilləri, şəhərin idarə , müəssisə rəhbərləri və şəhər ictimayəti iştirak ediblər. Heydər Əliyevin abidəsini ziyarət edib, önünə gül dəstələri düzüb,ruhuna hörmət və ehtiramlarını bildiriblər.
Qeyd edək ki, Azərbaycan xalqının Ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşmüşdür. Heydər Əliyevin həyat yolu yüksək insani-əxlaqi keyfiyyətləri özündə təcəssüm etdirən nümunəvi məktəbdir. Onun ölkəmizə rəhbərlik etdiyi illər tariximizə intibah, milli tərəqqi, milli oyanış, nəhayət, müstəqil dövlət quruculuğu dövrü kimi daxil olub.
Dünya tarixində hakimiyyəti dövründə Vətəni və xalqı üçün əvəzsiz xidmətləri olan çoxlu dövlət başçılarını nümunə göstərmək olar. Təbii ki, hər bir insan öz Vətənini və xalqını sevməli və onun üçün canından belə keçməyə hazır olmalıdır. Lakin, tarixdə elə bir Lider, elə bir İnsan var idi ki, O, nəinki öz canını və qanını Vətəni uğrunda, milləti uğrunda qurban verməyə hazır idi, hətta öz övladlarının belə həyatından Vətənini, Azərbaycanını üstün tuturdu.
Bəli, O, dünya şöhrətli siyasi xadim, ulu öndər Heydər Əliyev idi.
Dahi Şəxsiyyətin həyat yolunu demək olar ki, bütün Azərbaycan xalqı əzbər bilir və onun öndərliyini, millətinə və Azərbaycanına olan sevgisini heç zaman unutmur.
Bütün Azərbaycan gəncliyi bu gün Ulu Öndərin bizlərə miras qoyub getdiyi, tarixlərin əfsanəvi diyarı olan doğma Azərbaycanı canla-başla qoruyur, dahi şəxsiyyətin Vətənin övladlarına olan ümidlərini layiqincə doğruldur.
Göstərdiyi yüksək diqqət və qayğı ilə, imzaladığı fərman və sərəncamlarla, keçirdiyi çoxsaylı görüşlərlə, söylədiyi dərin məzmunlu nitqlərlə uzaqgörən sərkərdə milli sərhəd siyasətimizi formalaşdırmış, ölkəmizin sərhədlərinin mühafizəsi strategiyasını zərgər dəqiqliyi ilə müəyyənləşdirmişdir. Bu siyasəti uğurla davam etdirən Azərbaycan Respublikasının Prezidenti,Silahlı Qüvvələrin Ali Baş Komandanı cənab İlham Əliyevin Vətən müharibəsindəki möhtəşəm qələbə də öz vətəndaşlarına nə qədər bağlı olduğunu, dövlətimizin milli maraqlarını qətiyyətlə müdafiə etdiyini bir daha əyani göstərdi. Döyüşlərin getdiyi 44 gün ərzində cənab İlham Əliyev hərb meydanında müzəffər sərkərdə, diplomatik cəbhədə böyük strateq nümunəsi sərgilədi, informasiya müharibəsində Azərbaycanın haqq səsini məharətlə bütün dünyaya yaydı, bütün təzyiqlərə cəsarətlə sinə gərdi, öz xalqı ilə vəhdətdə olan lider kimi mübarizlik, müdriklik rəmzinə çevrildi.
Məlumat üçün bildirək ki, uzun müddət ABŞ-ın Klivlend klinikasında müalicə olunan Heydər Əliyev 2003-cü il dekabrın 12-də dünyasını dəyişib.
Məhz həmin gündən dekabrın 12-si xalqımızın Ümummilli lideri, Ulu öndər Heydər Əliyevin anım günüdür.
Allah rəhmət eləsin!
