İşemik insult keçirən xəstələrin təxminən dörddə birində bundan bir həftə əvvəl “mini-insult” əlamətləri müşahidə oluna bilər.
İnsult təcili tibbi müdaxilə tələb edən ciddi vəziyyətdir. Bu hal beyinə qan axınının qəfil pozulması nəticəsində yaranır. Əksər hallarda səbəb qan laxtası olur və bu, işemik insult adlanır. Məhz bu növ insult halların təxminən 85 faizini təşkil edir.
İnsult həmçinin qan damarının yırtılması nəticəsində də baş verə bilər. Bu isə hemorragik insult kimi tanınır.
Lakin daha az bilinən məqam odur ki, insult riski ilə bağlı xəbərdaredici əlamətlər əsas hadisədən 7 gün əvvəl ortaya çıxa bilər. Xüsusilə bəzi insanlarda tam insultdan əvvəl tranzitor işemik atak baş verir. Bu vəziyyət daha çox “mini-insult” kimi tanınır.
Araşdırmaya görə, işemik insult keçirən xəstələrin 23 faizi daha əvvəl tranzitor işemik atak yaşayıb. Bu xəstələrin 43 faizində mini-insult əsas insultdan 7 gün əvvəl baş verib.
Bundan başqa, xəstələrin 17 faizi tranzitor işemik atakı insultla eyni gün, 9 faizi isə insultdan bir gün əvvəl keçirib.
Nevroloq Aleksandra Alyoxina bildirib ki, insultdan əvvəl müşahidə edilə biləcək ən yayılmış TİA əlamətlərindən biri afaziyadır.
Afaziya nitqdə çətinlik, eləcə də başqalarının dediklərini anlamaqda problem yaranması deməkdir,
— deyə həkim qeyd edib.
Həkimlər xəbərdarlıq edirlər ki, nitqin qəfil pozulması, üzün bir tərəfində əyilmə, qol və ya ayaqda zəiflik, başgicəllənmə və görmə problemləri kimi əlamətlər yaranarsa, dərhal tibbi yardım çağırmaq lazımdır.
