Armudun müntəzəm istehlakı həzm sisteminin fəaliyyətini yaxşılaşdırmağa, toxluq hissini uzatmağa və qanda şəkərin səviyyəsini daha sabit saxlamağa kömək edə bilər.
Denmedia.az xəbər verir ki, bu barədə dietoloq Karolina Kaliquri La Nación nəşrinə müsahibəsində danışıb.
Mütəxəssisin sözlərinə görə, armudun ən mühüm üstünlüklərindən biri liflə zəngin olmasıdır. Tərkibindəki həll olunan və həll olunmayan qida lifləri bağırsaqların normal fəaliyyətini dəstəkləyir, qəbizliyin qarşısını almağa kömək edir və toxluq hissinin daha uzun müddət davam etməsini təmin edir.

Dietoloq bildirib ki, armudun qlisemik indeksi aşağıdır. Bu səbəbdən meyvənin istehlakı qanda şəkərin səviyyəsinin kəskin yüksəlməsi ehtimalını azaltmağa və enerjinin daha sabit qalmasına kömək edə bilər.
Armud həmçinin C vitamini və antioksidantlarla zəngindir. Bu maddələr hüceyrələri sərbəst radikalların yaratdığı oksidləşdirici təsirdən qorumağa kömək edir.

Kaliqurinin sözlərinə görə, meyvənin tərkibindəki kalium da orqanizm üçün mühüm əhəmiyyət daşıyır. Bu mineral maye balansının qorunmasında, sinir və əzələlərin normal fəaliyyətində, eləcə də arterial təzyiqin tənzimlənməsində iştirak edir.
Mütəxəssis armudun qabığı ilə birlikdə yeyilməsini də tövsiyə edib. Onun sözlərinə görə, meyvə yaxşı yuyulduqdan sonra qabığı ilə istehlak edildikdə tərkibindəki lif və faydalı bitki birləşmələrindən daha çox yararlanmaq mümkündür.

Bununla belə, dietoloq sağlamlığın qorunmasında yalnız bir məhsulun deyil, bütövlükdə balanslı və müxtəlif qidalanmanın mühüm rol oynadığını vurğulayıb.

