Paşinyan Azərbaycanla danışıqları niyə uzadır? - İLGİNC SƏBƏBLƏR

Bu gün Ermənistanın Azərbaycan və Türkiyə ilə münasibətləri normallaşdırmaq yönündə hansısa real addımlar atmaması bir sıra suallar doğurur. Əksər hallarda İrəvanın Qərblə yaxınlaşması və Rusiyadan uzaqlaşması fonunda bunun baş verməməsi normal hal kimi qəbul olunur. Belə ki, analitiklərin fikrincə, Ermənistan öncə Rusiyadan qopmalı və Qərblə yaxınlaşmalıdır ki, sonra Azərbaycan və Türkiyə ilə münasibətləri normallaşdıra bilsin.

Bəs görəsən, bu ehtimallar həqiqətə uyğundurmu? 

Mövzunu "Den.az"a şərh edən Orta Doğu Araşdırmaları Mərkəzinin rəhbəri, siyasi şərhçi Sədrəddin Soltan bildirib ki, Paşinyanın əsas hədəfi Rusiyadan uzaqlaşıb münasibətləri Qərblə normallaşdırmaqdır: "Nikol daha çox Rusiyanın hərbi-siyasi nüfuz dairəsindən çıxmağa çalışır. Ona görə də, Azərbaycan tərəfi ilə danışıqları uzadır. Amma digər tərəfdən, münasibətləri normalllaşdırmağa yönəlik sülh sazişini imzalamaq istəyində olan tərəf kimi görünməyə çalışır. Çünki Paşinyan və onun komandası həm Türkiyə, həm Azərbaycan, həm də Rusiya ilə danışıqlar aparıb üç tərəfi də razı salmaq iqtidarında deyil. Buna görə də, Azərbaycan və Türkiyə ilə münasibətləri normallaşdırmaq adı altında danışıqları davam etdirib Rusiya ilə məsələni yoluna qoymağa səy göstərir. Bundan sonra davamlı olaraq məsələlərə baxmaq məqsədi güdür. Çünki hər üç tərəflə münasibətləri nizamlamaq istiqamətində dialoq apararsa, o zaman Ermənistan yanlışlıqlara yol verəcəyini düşünür. Ən optimal yol danışıqlar adı altında dialoqu davam etdirib Rusiya ilə əlaqələri dayandırmaqdır. Əgər Ermənistan Azərbaycanla sülh müqaviləsi imzalamaq istəyirsə, o zaman sərhədlərin müəyyənləşməsi yönündə addımlar atılardı. Amma bununla bağlı heç bir addım atılmır. Kommunikasiya və nəqliyyat infrastrukturunun bərpası ilə bağlı da heç bir addım müşahidə edilmir. Odur ki, Ermənistan Türkiyənin və Azərbaycanın başını danışıqlara qatmaqla Rusiyadan uzaqlaşmağı hədəfləyir. Bunun üçün ilk addım KTMT-dən uzaqlaşmaqdan başlayır. Bunun ardınca Gümrüdəki bazanın və hərbi aerodomun ləğvi məsələsi gündəmə gələcək. Odur ki, bu tip məsələlər həll olunmadan Ermənistan Azərbaycan və Türkiyə ilə normallaşma prosesini başa çatdırmağı düşünmür".

Günəş Fərəh,

Den.az