Şəhid Namiq Hüseynovun anım mərasimi keçirilib - VİDEO

I Qarabağ Müharibəsi zamanı torpaqlarımızın müdafiəsi uğrunda qəhrəmancasına şəhid olan Hüseynov Namiq Heydər oğlunun 50 illik yubileyi münasibətilə tədbir keçirilib.  

Qubadlı Rayon İcra Hakimiyyətinin təşkilatçılığı ilə keçirilən tədbirdə Rayon İcra Hakimiyyəti başçısının müavini Allahverdi Haxverdiyev, Sumqayıt Şəhər Polis İdarəsinin rəisi Fəqan Azadəliyev, RİH-in işçiləri, idarə, müəssisə, təşkilat rəhbərləri, RİHB-nın inzibati ərazi dairəsi üzrə nümayəndələri, məktəb kollektivi, şəhidin ailə üzvləri, yaxınları və ictimaiyyət nümayəndələri iştirak ediblər. 

Əvvəlcə Abşeron rayonu, Stansiya Sumqayıt ərazisi, Yeni yaşayış massivində Şəhid Namiq Heydər oğlu Hüseynovun xatirə  barelyef lövhəsinin açılış mərasimi baş tutub. Daha sonra Sumqayıt şəhər “Şəhidlər xiyabanı”nda şəhidin məzarı ziyarət olunub, məzarı üzərinə əklil və gül dəstələri qoyulub, ruhuna dualar oxunub. Şəhidin həyat və döyüş yolundan söz açılıb. Bildirilib ki, şəhid Namiq Hüseynov torpaqlarımızın erməni təcavüzündən qorunması naminə könüllü olaraq Millli Ordu sıralarına daxil olub. İki ilə yaxın rayonun Ermənistanla sərhəd kəndlərindəki döyüşlərdə fədakarlıqla vuruşub. 1994-cü ilin əvvəllərindən Zəngilan, Ağdam və Tərtər rayonlarının ərazilərində gedən şiddətli döyüşlərdə əsl igidlik nümunələri göstərərək erməni təcavüzkarlarının məhv edilməsində iştirak edib.
 
Tədbir Qubadlı rayon Hafiz Quliyev adına Çaytumas kənd məktəb-liseyində davam etdirilib. Öncə şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının dövlət himni səsləndirilib. Ardınca Şəhidimizin həyat və döyüş yolundan bəhs edən videoçarx nümayiş olunub. 

Tədbirdə çıxış edən Qubadlı Rayon İcra Hakimiyyəti başçısının müavini Allahverdi Haxverdiyev bildirib ki, I Qarabağ müharibəsində Qubadlı rayonundan 238 nəfər Şəhid, 274 nəfər isə əlil olub, 100 nəfərdən çox sakin isə itkin düşüb. Allahverdi Haqverdiyev əlavə edib ki, 44 günlük Vətən Müharibəsində Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə ölkənin ərazi bütövlüyünü, tarixi ədaləti, beynəlxalq hüququ bərpa edib. Ermənistanın Azərbaycana qarşı təcavüzünün qarşısını almaq məqsədi ilə 27 sentyabrda bütün cəbhə boyu əks-hücuma keçən Azərbaycan Ordusu 1990-cı illərin əvvəlində baş vermiş Birinci Qarabağ Müharibəsi zamanı Ermənistan tərəfindən işğal edilmiş əraziləri düşmən tapdağından təmizləyib. “Vətən Müharibəsi” adlandırılan müharibə Şanlı Azərbaycan Ordusunun gücünü göstərərək Azərbaycanın qələbəsi ilə başa çatıb. Eyni zamanda bildirib ki, 19-20 sentyabr 2023-cü il tarixlərində Azərbaycanın Konstitusiya quruluşunun bərpa edilməsi məqsədilə bölgədə aparılan antiterror tədbirləri nəticəsində Azərbaycan öz suverenliyini tam bərpa edib. Prezident, Müzəffər Ali Baş Komandan İlham Əliyev tərəfindən həmin ərazilərdə - Xocavənd, Əsgəran, Xocalı, Ağdərə, Xankəndi şəhərlərində Azərbaycan bayrağı qaldırılıb və bu gün Azərbaycan Bayrağı işğaldan azad olunan bütün ərazilərdə qürurla dalğalanır.

Çıxışlardan sonra Şərqi Zəngəzur Regional Mədəniyyət idarəsinin Qubadlı rayon nümayəndəliyi və Çaytumas kənd məktəb-lisey şagirdləri tərəfindən vətənpərvərlik mövzusunda və şəhidlərimizin əziz xatirəsinə həsr olunmuş şeirlər səsləndirilib, muğam parçaları ifa olunub.
   
Qeyd edək ki, Şəhid Hüseynov Namiq Heydər oğlu 1974-cü il oktyabr ayının 16-da Zəngəzur mahalı Qubadlı rayonunun Novlu kəndində anadan olub. 1990-cı ildə Novlu kənd tam orta məktəbini bitirib. 1992-ci ilin noyabr ayında torpaqlarımızın erməni təcavüzündən qorunması naminə könüllü olaraq Millli Ordu sıralarına daxil olub. İki ilə yaxın rayonun Ermənistanla sərhəd kəndlərindəki döyüşlərdə fədakarlıqla vuruşub. 1994-cü ilin əvvəllərindən Zəngilan, Ağdam və Tərtər rayonlarının ərazilərində gedən şiddətli döyüşlərdə əsl igidlik nümunələri göstərib, erməni təcavüzkarlarının məhv edilməsində iştirak edib. O, göstərdiyi şücaətlərə görə dəfələrlə hərbi hissənin mükafatlarına layiq görülüb. 1994-cü il oktyabr ayının 3-də Füzuli ərazisində gedən ağır döyüşlərdə döyüş tapşırıqlarını yerinə yetirərkən 20 yaşının tamam olmasına 13 gün qalmış qəhrəmancasına Şəhidlik zdirvəsinə yüksəlib.  Sumqayıt şəhər “Şəhidlər xiyaban”ında dəfn olunub.