Sumqayıtın 2 nömrəli məktəbində məktəbəhazırlıq qrupları fəaliyyətə başlayıb-VİDEO

"Qüvvət elmdədir başqa cür heç kəs, heç kimə üstünlük eyləyə bilməz".

Bəli, yalnız uğurlu  təhsil almaq və elmi biliklərə yiyələnməklə güclü rəqabətə tab gətirmək mümkündür. Bu gün məktəbəqədər hazırlıq qruplarına qədəm qoyan balaca fidanlar da təhsil yolunda ilk addımlarını atdıqları üçün həm sevincli, həm də həyəcanlı görünürdülər. Çünki ilk dəfə parta arxasında əyləşib əllərində qələm tutaraq ilk cümlələrini yazacaqlar. 

Çəkiliş apardığımız 2 nömrəli tam orta məktəbin məktəbəhazırlıq qrupuna qədəm qoyan balaca uşaqlar  öz sinif otaqlarına daxil olaraq parta arxasında əyləşiblər. Balaca fidanları qarşılayan müəllimlər və övladlarını məktəbə yola salan  valideynlər də ən az uşaqlar qədər həyəcanlı görünürdülər. Məktəbəhazırlıq qrupunda təhsil pilləsinə başlayan uşaqların şeir töhfələri bu həyəcanı nisbətən azaldıb.
Direktor Xalid Adıgözəlov balaca fidanlara ilk təhsil addımlarında uğurlar arzulayıb.

Qeyd edək ki qruplarda “Ətraf aləmlə tanışlıq”, “Bədii təfəkkürün inkişafı”, “Savad təliminə hazırlıq və nitq inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi və fiziki mədəniyyət” fənləri öyrədilir.