Sumqayıtın 3 nömrəli tam orta məktəbi təhsil uğurlarına görə ön sıradadır - VİDEO

Cəmiyyətin inkişafının əsasında duran ən mühüm amil insanın formalaşması, təlim və təhsil almasıdır. İnsanın bir şəxsiyyət kimi formalaşmasında aldığı təhsilin rolu böyükdür. Elm, savad, təhsil həm də dünyagörüşüdür, insanı yüksəldən mənəvi ucalıqdır. İnsan yalnız elmi və  bacarığı ilə başqalarından fərqlənə, onlara nisbətən üstün mövqeyə malik ola bilər.  Necə deyərlər, "Qüvvət elmdədir başqa cür heç kəs, heç kimə üstünlük eyləyə bilməz". Bu gün özünün yeni inkişaf mərhələsinə qədəm qoyan Azərbaycanın təhsil müəssisələrində məhz gələcəyin savadlı kadrlarının, ən önəmlisi isə vətənə, dövlətə layiq şəxsiyyətlərin yetişdirilməsi üçün hər cür şərait yaradılıb. Yeni-yeni məktəblər tikilərək istifadəyə verilir, peşəkar kadrların hazırlanması prioritet təşkil edir, təhsil müəssisələrinin maddi-texniki bazası gücləndirilir. Belə məktəblərdən biri də Abşeron-Xızı Regional Təhsil İdarəsinin tabeliyində olan və Sumqayıt şəhərində yerləşən 3 nömrəli tam orta məktəbidir.

1964-ci ildən fəaliyyət göstərən məktəbdə hazırda 42 sinifdə 1370 şagird təhsil alır. Eyni zamanda məktəbəhazırlıq qrupunda 4 sinifdə 110 şagird təhsilin sirlərinə yiyələnir. Direktor müavini Tükəzban Nəcəfova bildirib ki, təhsil müəssisəsinin direktoru Ülkər Çəndirlinin rəhbərliyi ilə məktəb bir sıra uğurlara imza atıb. Belə ki, 9-11-ci sinif şagirdləri arasında keçirilən "Sabahın Alimləri" 13-cü Respublika müsabiqəsində "Fizika və Astronomiya" üzrə məktəib şagirdi Nigar Məmmədli 3-cü yerə layiq görülüb. Həmçinin 9-cu sinif şagirdi Gülü Zamanlı Estoniyanın Tallin şəhərində keçirilən Taekvando yarışından 1-ci yerə layiq görülərək qızıl medal qazanıb. Bundan başqa 9-cu sinif şagirdi Yağmur Məmmədli Sumqayıtın 75 illik yubileyinə həsr olunan "Əbədi gənc Sumqayıt" adlı festival müsabiqəsində rəsm nominasiyası üzrə 1-ci yerə layiq görülüb. Eyni zamanda 5-ci sinif şagirdi Eldar Ağacanov Beynəlxalq Şahmat Festivalında oğlanlar arasında1-ci yerin sahibi olub. Qeyd edək ki, 3 nömrəli tam orta məktəbdə ötən tədris ilində ali məktəbə qəbul 60 faiz təşkil edib. 

Təhsilin başlıca məqsədi cəmiyyət üçün zəruri və faydalı şəxsiyyətin, yüksək mənəvi potensiala malik, əməyi arzulayan və əməya qadir olan ideyaca mətin, estetik cəhətdən həssas və fiziki cəhətdən inkişaf etmiş insanın formalaşmasıdır. Sumqayıt şəhər 3 nömrəli tam orta məktəbin pedaqoji kollektivi qarşıya məhz bu məqsədi qoyub. Dərslərin interaktiv üsulla keçirilməsi, siniflərdəki nizam-intizam, müəllimlərin fərqli və maraqlı metodlarla öz fənnlərini tədris etməsi bunun əyani sübutudur. 

Qeyd edək ki, Abşeron-Xızı Regional Təhsil İdarəsinin tabeliyində olan bütün təhsil müəssisələri öz yüksək qəbul nəticələrinə, fənn olimpiadalarında qazanılan uğurlara görə, respublikanın orta ümumtəhsil məktəbləri arasında xüsusilə fərqlənir. Bu, adıçəkilən idarənin rəhbərliyinin təhsil müəssisələrinə göstərdiyi diqqət və qayğının nəticəsi kimi dəyərləndirilə bilər.