Xırdalan şəhər 8 nömrəli tam orta məktəbin məktəbəhazırlıq qrupuna 132 uşaq qəbul edilib-VİDEO

Kimisi ağlayaraq valideynlərinə sarılır, kimisi isə gülərək sevincini hər kəslə bölüşür. Görüntülər Abşeron-Xızı Regional Təhsil İdarəsinin tabeliyində fəaliyyət göstərən Xırdalan şəhər 8 nömrəli tam orta məktəbdəndir.
 
Bu təhsil müəssisəsinin məktəbəhazırlıq qrupuna qəbul edilən uşaqlar sıra ilə öz sinif otaqlarına daxil olublar. 
 
Direktor Mahnur Hüseynova uşaq və valideynləri səmimi qarşılayaraq bu  münasibətlə təbrik edib və uğurlar arzulayıb. Bildirib ki, Xırdalan şəhər 8 nömrəli tam orta məktəbdə tədrisin səviyyəsini yüksəltmək üçün bütün imkanlar yaradılıb. 5 yaşlılar hərtərəfli şəraitlə təmin olunmuş müasir məktəbdə oxuyaraq sabahın naziri, deputatı, alimi, dünya çempionu, kompüter mühəndisi, insanlara şəfa verəcək həkim, sözünü deməyi bacaran jurnalist, bir sözlə, xalqına, millətinə layiq vətəndaş olacaqlar.
 
Məlumat üçün bildirək ki, təhsil üçün ilk addım kimi xüsusi yükü özündə daşıyan məktəbəhazırlıq prosesi müasir dövrdə daha da inkişaf edir. Müxtəlif formatlı dərslər tədris olunur. Qruplarda “Ətraf aləmlə tanışlıq”, “Bədii təfəkkürün inkişafı”, “Savad təliminə hazırlıq və nitq inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi və fiziki mədəniyyət” fənləri öyrədilir.