Xırdalanın bu məktəbində dərslər tam fərqli metodlarla keçirilir-VİDEO

Cəmiyyətin inkişafının əsasında duran ən mühüm amil insanın formalaşması, təlim və təhsil almasıdır. İnsanın bir şəxsiyyət kimi formalaşmasında aldığı təhsilin rolu böyükdür. Elm, savad, təhsil həm də dünyagörüşüdür, insanı yüksəldən mənəvi ucalıqdır. İnsan yalnız elmi və  bacarığı ilə başqalarından fərqlənə, onlara nisbətən üstün mövqeyə malik ola bilər.  Necə deyərlər, "Qüvvət elmdədir başqa cür heç kəs, heç kimə üstünlük eyləyə bilməz". Bu gün özünün yeni inkişaf mərhələsinə qədəm qoyan Azərbaycanın təhsil müəssisələrində məhz gələcəyin savadlı kadrlarının, ən önəmlisi isə vətənə, dövlətə layiq şəxsiyyətlərin yetişdirilməsi üçün hər cür şərait yaradılıb. Yeni-yeni məktəblər tikilərək istifadəyə verilir, peşəkar kadrların hazırlanması prioritet təşkil edir, təhsil müəssisələrinin maddi-texniki bazası gücləndirilir. Belə məktəblərdən biri də Abşeron-Xızı Regional Təhsil İdarəsinin tabeliyində olan və Xırdalan şəhərində yerləşən 7 nömrəli tam orta məktəbidir. 

2007-ci ildən fəaliyyət göstərən məktəbdə hazırda 2238 şagird təhsil alır. Onların təlim-tərbiyyəsi ilə 95 nəfərdən ibarət pedaqoji heyət məşğul olur. Qeyd edək ki, təhsil müəssisəsi 2014-cü ildə əsaslı təmir olunub. Eyni zamanda məktəbdə yeni korpus tikilərək şagirdlərin istifadəsinə verilib. Direktor Yeganə Paşayeva məktəbin uğurları haqqında böyük sevinc və fəxr hissi ilə danışıb.

Təhsilin, məktəbin vəzifəsi insanı həyata hazırlamaqdır. Savadlı insan əşya və hadisələrə qiymət verməyi, sağlam ünsiyyət qurmağı bacarmalıdır. Təhsilin başlıca məqsədi cəmiyyət üçün zəruri və faydalı şəxsiyyətin, yüksək mənəvi potensiala malik, əməyi arzulayan və əməya qadir olan ideyaca mətin, estetik cəhətdən həssas və fiziki cəhətdən inkişaf etmiş insanın formalaşmasıdır. Xırdalan şəhər 7 nömrəli tam orta məktəbin pedaqoji kollektivi qarşıya məhz bu məqsədi qoyub. Dərslərin interaktiv üsulla keçirilməsi, siniflərdəki nizam-intizam, müəllimlərin fərqli və maraqlı metodlarla öz fənnlərini tədris etməsi bunun əyani sübutudur. 

Qeyd edək ki, Abşeron-Xızı Regional Təhsil İdarəsinin tabeliyində olan bütün təhsil müəssisələri öz yüksək qəbul nəticələrinə, fənn olimpiadalarında qazanılan uğurlara görə, respublikanın orta ümumtəhsil məktəbləri arasında xüsusilə fərqlənir. Bu, adıçəkilən idarənin rəhbərliyinin təhsil müəssisələrinə göstərdiyi diqqət və qayğının nəticəsi kimi dəyərləndirilə bilər.