Sumqayıt məktəblərində Bilik Günü belə qeyd olundu -VİDEO

Bu gün Azərbaycanın təhsil müəssisələrində Bilik günü qeyd olunub.

Den.az xəbər verir ki, Sumqayıtın təhsil ocaqlarında da Bilik Günü münasibəti ilə böyük coşğu yaşanıb. 
 
Belə ki, qəbul imtahanlarında Sumqayıt şəhəri üzrə ən yüksək nəticə göstərən təhsil müəssisələrindən biri olan 23 nömrəli tam orta məktəbdə Bilik Günü böyük təntənə ilə qeyd olunub. Tədbirdə çıxış edən direktor Reyhan Yunisova yeni tədris ilində qarşıya qoyulan hədəflərdən və təhsil sahəsində aparılan islahatlardan söz açıb. Ulu Öndər Heydər Əliyevin Azərbaycan təhsilinin inkişafındakı əvəzsiz xidmətlərindən, bu gün ölkə rəhbərliyinin təhsil sahəsində apardığı uğurlu siyasətdən danışıb. Direktor birinciləri təbrik edərək, yeni dərs ilində müəllim və şagirdlərə uğurlar arzulayıb.
 
Digər çıxış edənlər Azərbaycanda təhsil üçün yaradılan geniş imkanlara diqqət çəkiblər. Bildiriblər ki, Prezident İlham Əliyevin göstərişi ilə tikilən məktəblər gənc nəslin mükəmməl təhsilə yiyələnməsi, gələcəkdə Azərbaycanımızın adını zirvələrə qaldırması üçün zəmin yaradır. "Məktəb xüsusi bir dünyadır. Məktəb qürur və sevincdir”, - deyə çıxışçılar fikirlərini tamamlayıblar. 
 
Tədbir bir-birindən maraqlı rəqs kompazisiyaları və musiqi ifaları ilə davam etdirilib. 
 
Çəkiliş apardığımız Nəsrəddin Tusi adına 12 nömrəli tam orta məktəbə ilk dəfə ayaq basan birincilər böyük sevgi və təntənə ilə qarşılanıblar. Uşaqların və valideynlərin sevinci bir-birinə qarışıb. Tədbirdə öncə Azərbaycanın dövlət himni səsləndirilib və şəhidlərimizin əziz xatirəsi anılıb. 
 
Direktor Reyhan Baxşıyeva təhsil müəssisəsinin yeni dərs ilinə tam hazır olduğunu bildirib və ilk dəfə məktəbə ayaq basan birinciləri təbrik edib.
 
Digər çıxış edənlər də bu il ilk dəfə məktəbə gedən balaca fidanları təbrik edərək onlara gələcək təhsil həyatında uğurlar arzulayıblar.
 
Bayram tədbiri birincilərin hazırladıqları şeirlər və müsiqi nömrələri ilə davam edib. 
 
Eyni hiss və həyəcan çəkiliş apardığımız İsmət Qayıbov adına 1 nömrəli tam orta məktəbdə də yaşanıb. Möhtəşəm şəkildə bəzənən təhsil ocağı ilk dəfə məktəbə ayaq basan birinciləri qarşılayıb. Direktor Kəmalə Hüseynova təhsil müəssisəsinin yeni tədris ilinə tam hazır olduğunu diqqətə çatdırıb və birinciləri təbrik edib.
 
1 nömrəli tam orta məktəbdə bayram tədbiri birincilərin hazırladıqları rəqs və müsiqi nömrələri ilə davam edib. 
 
Sumqayıt şəhər 2 nömrəli tam orta məktəbdə də Bilik Günü möhtəşəm şəkildə qeyd olunub. İlk dəfə təhsil müəssisəsinə ayaq basan birincilər sinif otaqlarına daxil olaraq parta arxasında əyləşiblər. Müəllimlərin balaca fidanlara sevgi, diqqət və qayğısı xüsusilə fərqlənib.
 
Direktor Xalid Adıgözəlov təhsil müəssisənin uğurları barədə danışıb və Bilik Günü münasibəti ilə bütün təhsil işçilərini və şagirdləri təbrik edib.
 
Qeyd edək ki, Abşeron-Xızı Regional Təhsil İdarəsinin tabeliyində olan bütün məkttəblərdə Bilik Günü böyük coşğu ilə keçirilib və məktəblərdə şagirdlərin yüksək səviyyədə təhsil alması üçün hər bir şərait yaradılıb.
 
Xatırladaq ki, bu əlamətdar gün Prezident İlham Əliyevin 2004-cü il 21avqust tarixli Fərmanına əsasən təsis edilib.