Ölkədə müasir təhsil infrastrukturunun qurulması, məktəblərin maddi-texniki bazasının yaxşılaşdırılması şagirdlərin keyfiyyətli təhsilə əlçatanlığı baxımından olduqca həlledici amildir. Abşeron rayonu, Xırdalan şəhərində yerləşən 2000 şagird yerlik yeni məktəbin tikintisi də bu yanaşmanın təzahürüdür.
“Den.az” xəbər verir ki, bunu jurnalistlərə açıqlamasında Abşeron-Xızı Regional Təhsil İdarəsinin İctimaiyyətlə əlaqələr üzrə məsul şəxsi Səbinə Məmmədova deyib.
Bildirilib ki, yeni məktəb əhalinin artımı ilə digər məktəblərdə yaranmış şagird sıxlığını aradan qaldıracaq.
Tikintisinə 2021-ci ildə başlanan 2000 yerlik təhsil ocağında 74 sinif otağı var. Burada 6 laboratoriya, 8 STEAM, məktəbəhazırlıq otaqları, 6 informatika kabineti, hərbi hazırlıq, əmək otaqları, kitabxana, 2 idman zalı və 388 yerlik akt zalı mövcuddur.
Qeyd edək ki, bu məktəbdə də xüsusi yer ayrılan STEAM otaqları son illərdə bu istiqamətdə ardıcıl yanaşmanın daha bir nümunəsidir. STEAM layihəsi birinci xanım Mehriban Əliyevanın təşəbbüsü ilə 2019-2020-ci tədris ilinin əvvəlindən məktəblərimizdə tətbiq edilir. STEAM təhsili praktik məşğələlər vasitəsilə elmi, texniki biliklərin gündəlik həyatda tətbiqini şagirdlərə göstərməklə yanaşı, onlara mühəndislik səriştələri öyrədir.
Qeyd edək ki, təhsil müəssisələrinin işinin, tədris proqramlarının müasir çağırışlara uyğunlaşdırılması, yeni əmək bazarına uyğun kadr potensialının formalaşdırılması dövlətimizin prioritetləri sırasındadır. Son illərdə Prezident İlham Əliyevin rəhbərliyi ilə ölkədə təhsilin inkişafı istiqamətində aparılan islahatlar bu sahənin keyfiyyətcə yeni mərhələyə qədəm qoyması ilə nəticələnib. Bütün bu işlər həm də onu göstərir ki, Azərbaycanda təhsilin və elmin inkişafına ən yüksək səviyyədə dövlət qayğısı var. Bu, hər şeydən əvvəl Azərbaycanda insan kapitalının daha da inkişaf etdirilməsi, gənc nəslin müasir, intellektual və savadlı yetişməsi üçün dövlətin həyata keçirdiyi siyasətin əsas prioritetlərindən biridir. Müasir məktəblərin tikilərək istifadəyə verilməsi, təhsil müəssisələrində bərpa və yenidənqurma işlərinin ardıcıl xarakter alması da bu prosesin tərkib hissəsidir. Bu strategiyaya Heydər Əliyev Fondu da 2005-ci ildən icra olunan “Yeniləşən Azərbaycana - yeni məktəb” proqramı ilə davamlı şəkildə dəstək verir.
