36 yaşlı Hili Napemalu Samuel iyunun 14-də ölkənin Buake şəhərində polis tərəfindən saxlanılıb.
İddia olunur ki, dindirilmə zamanı Samuel bir uşağı qaçırdığını və onun ölümündə iştirakını etiraf edib. O, həmçinin bu hadisənin ritual məqsədlərlə bağlı olduğunu bildirib.
Seneweb-in məlumatına görə, saxlanılan şəxs daha üç uşağın ölümü ilə bağlı da etiraf verib. Polis onun göstərdiyi ərazidə axtarış aparıb və insan qalıqları aşkar edib.
Qurbanların şəxsiyyəti hələlik müəyyənləşdirilməyib. Onların qalıqları ekspertizaya göndərilib.
Samuel barəsində istintaq davam edir. Prokurorluq yaxın vaxtlarda onun məhkəmə qarşısına çıxarılacağını bildirib.
Polis hadisənin bütün hallarının araşdırıldığını, həmçinin saxlanılan şəxsin bölgədə uşaqların itkin düşməsi ilə bağlı digər hallarla əlaqəsinin olub-olmadığının yoxlanıldığını açıqlayıb.
İstintaq çərçivəsində onun tək hərəkət edib-etmədiyi və mümkün şəriklərinin olub-olmadığı da araşdırılır.
