İnkişaf etmiş əzələ kütləsi gənclik və aktivlik dövrünü uzatmağa kömək edə bilər.
Bu barədə KP.RU-ya terapevt, preventiv tibb üzrə mütəxəssis Kirill Belan danışıb.
Həkimin sözlərinə görə, müasir həyat tərzi səbəbindən əzələləri qorumaq və inkişaf etdirmək əvvəlkindən daha çətindir. İnsanlar daha az hərəkət edir, uzun müddət oturaq vəziyyətdə qalır və gündəlik fiziki yüklənmə azalır.
Belan bildirib ki, əzələ kütləsi orta hesabla artıq 30 yaşdan sonra azalmağa başlayır. Onun sözlərinə görə, insan hər 10 ildən bir əzələ kütləsinin təxminən 3-8 faizini itirə bilər.
Mütəxəssis qeyd edib ki, əzələlər kifayət qədər işləmədikdə orqanizm qlükozanın daha böyük hissəsini qaraciyərə yönəldir. Orada qlükoza qlikogen şəklində ehtiyat kimi toplanır.
Qlikogen artdıqda isə qaraciyər artıq karbohidratları yağa çevirməyə başlayır. Bu yağlar qana keçərək ateroskleroz riskini artıra, damarların və ürəyin vəziyyətinə mənfi təsir göstərə bilər.
Həkim vurğulayıb ki, əzələ kütləsini qorumaq yalnız xarici görünüş üçün deyil, həm də maddələr mübadiləsi, ürək-damar sağlamlığı və aktiv qocalma baxımından vacibdir.
