Yazıçı Samir İmanovun "Arzularımın Rəqsi" adlı kitabının təqdimat mərasimi keçirilib - VİDEO

"Səsdən Könüllərə" layihəsinin təşkilatçılığı ilə yazıçı Samir İmanovun "Arzularımın Rəqsi" adlı kitabının təqdimat mərasimi keçirilib.Sumqayıt şəhər Heydər Əliyev Mərkəzində keçirilən tədbirdə elm adamları, yazıçılar, ziyalılar, psixoloqlar və ictimaiyyət nümayəndələri iştirak ediblər. 

Təqdimat mərasimində çıxış edən "Səsdən Könüllərə" layihəsinin rəhbəri Əsmər Kərimova tədbirə təşrif buyuran hər kəsi salamlayıb, bu günə dəyər qatan qonaqlara öz təşəkkürünü bildirib. Əsmər Kərimova birinci qrup əlil olan Samir İmanov haqqında danışaraq onun xüsusi istedada malik bir şəxsiyyət olduğunu, bundan öncə 4 kitabının ictimaiyyətə təqdim edildiyini diqqətə çatdırıb. Onun yazdığı hər bir kitabın xüsusən fiziki problemi olan şəxslərin cəmiyyətə asan adaptasiya olmasına töhfə verdiyini bildirib. Əsmər Kərimova qeyd edib ki, "Arzularımın Rəqsi" adlı kitab öz arzularının arxasınca getmək istəyən, yalnız bu yolda müəyyən əngəllərlə qarşılaşaraq istəyindən vaz keçən bütün insanlar üçün əsl motivasiya rolunu oynayacaq. 

Daha sonra çıxış üçün söz kitabın müəllifi, yazıçı Samir İmanova verilib. O da öz növbəsində dəyərli vaxtlarını ayıraraq təqdimetmə mərasiminə qatılan bütün qonaqlara təşəkkürünü bildirib. Kitab haqqında danışan müəllif bunun öz oxucuları ilə görüşmək üçün yeni imkan olduğunu vurğulayıb.

Daha sonra tədbirdə çıxış edən digər qonaqlar müəllifə ən xoş arzularını bildiriblər və bundan sonrakı fəaliyyətində ona uğurlar arzulayıblar. Bu cür kitabların cəmiyyətə adaptasiya problemi yaşayan və əlilliyi olan şəxslərin dünya görüşünə böyük təsir göstərəcəyinə əminliklərini ifadə ediblər.  Gənclərin çıxışları və tədbir haqqında öz fikirlərini bildirmələri maraqla qarşılanıb.

Təqdimetmə mərasimi musiqili qonağın bir-birindən maraqlı və fərqli ifaları ilə davam etdirilib.