Bağçalarda uşaqların qida rasionu necə olmalıdır?

“Bağçalarda uşaqların qida rasionu ilə bağlı mövcud standartlara dəyişikliklərin edilməsi nəzərdə tutulur”. Bu barədə Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov deyib. Onun sözlərinə görə, hazırda bağçalarda qidalanma qanunvericilikdə nəzərdə tutulan standart və normalar əsasında həyata keçirilir. Bəs ümumiyyətlə bağçalarda uşaqların qida rasionu necə olmalıdır?

Mövzu ilə əlaqədar qida texnoloqu Ağa Salamov “Den.az”a bildirib ki, bağçalarda uşaqlara qidalanmadan öncə tərbiyəçilər tərəfindən sağlam qidalanma haqqında maarifləndirmə işləri aparılmalıdır: “Bunun üçün mütəxəssis olmağa ehtiyac yoxdur. Sadəcə olaraq uşaqları maarifləndirmək lazımdır ki, sizə nə faydalıdır, nəyə görə kök yeməlisiniz? Nəyə görə yarmaları yeməlisiniz və s. Bunlarla bağlı ilk növbədə tərbiyəçi məşğul olmalıdır. Amma indi baxırıq ki, tərbiyəçi gəlir, uşağın qabağına yeməyi qoyur və gedir”.

Ekspert uşaqların menyusunu mütləq təşkil etməli qidalardan bəhs edib: “Əvvəllər bağçalarda uşaqlara kisel, yaxud kompot verərdilər. Bunlar şərtdir, çünki mövsümündə yetişən meyvələrdən hazırlanmış kompotlar həm vitamin və mineral deposudur, həm də tərkibində lif var. Suyunda lif olmasa da, onun meyvəsini yeyəndə lifini də istehlak etmiş olurlar və uşaqlar üçün faydası çoxdur. Bundan başqa yarmalar, yəni karbohidrat olaraq gül kələm, brokoli, qarabaşaq, bulqur yarması və s. kimi qarnirlər uşaqların qida rasionunda həftəlik olaraq öz yerini tapmalıdır. Çünki bunlar da vitamin və mineral deposu olmaqla yanaşı, bağırsaqlarda da yaxşı mənimsənilir. Həmçinin uşaqların menyusunda zülallardan istifadə olunmalıdır”.

A.Salamovun sözlərinə görə, almanlar bağçada uşaqlara qidaları mahnı şəklində öyrədirlər: “Biz ona görə deyirik ki, təlimçiləri maarifləndirmək üçün addımlar atmalıdır. Məsələn, Almaniya təcrübəsində gündəlik olaraq uşaqlara mahnı oxuyurlar ki, bu gün balıq günüdür, yaxud bu gün bizim ət günümüzdür və s. Əgər bu gün ət varsa, ancaq ət yeyilməlidir, yaxud toyuqdursa, ondan başqa heç nə vermək olmaz, həmin gün uşaqlar ancaq toyuq yeməlidir. Çox vaxt uşaqlara balıq verməyə qorxurlar. Amma balığın bağçalarda saxlanma şəraiti düzgündürsə, mənşəyi məlumdursa, düzgün şərtlər altında emal olunub, bişirilib təqdim olunursa, o zaman heç bir şeydən qorxmağa ehtiyac yoxdur. Qida rasionunda əvəzolunmaz yağ turşuları ilə, B12 viamini ilə, Omeqa-3 ilə zəngin olan balıq, toyuq və ət məhsulları mütəmadi olaraq bişirilib sağlam şəkildə uşaqlara təqdim olunmalıdır”.

Günəş Fərəh,
Den.az