Abşerondakı bu bağçada uşaqlar necə qidalanır? - FOTOLAR

Son illər Azərbaycanın dövlət məktəbəqədər təhsil müəssisələrinin durumunun və səviyyəsinin yüksəldilməsi yönündə ardıcıl addımlar atılır. Xüsusən, təlim-tərbiyə prosesinin müasir metodlarla həyata keçirilməsi, bağçalarda davamiyyətin qorunub-saxlanılması və daha da təkmilləşdirilməsi prioritet təşkil edir. Bu baxımdan Abşeron-Xızı Regional Təhsil İdarəsinin tabeliyində fəaliyyət göstərən məktəbəqədər təhsil müəssisələri öz üzərinə düşən vəzifələrin öhdəsindən layiqincə gəlməyi bacarır.

Den.az xəbər verir ki, belə məktəbəqədər təhsil müəssisələrindən biri də Ceyranbatan qəsəbə 2 nömrəli körpələr evi uşaq bağçasıdır.

Qeyd edək ki, Ceyranbatan qəsəbə 2 nömrəli körpələr evi uşaq bağçası 2015-ci ildən fəaliyyət göstərir. Belə ki, 6 qrupluq, 115 yerlik olan bağçada 12 tərbiyəçi müəllim balaca fidanların gələcəkdə vətənə və dövlətə layiq vətəndaş kimi yetişməsi üçün əlindən gələni əsirgəmir. 

Məktəbəqədər təhsil müəssisəsinin müdiri Zeynəb Ağayevanın rəhbərliyi ilə bütün kollektiv uşaqların fiziki və əqli inkişafının təmin edilməsi, müxtəlif bilik və vərdişlərə yiyələnməsi üçün açıq məşğələlər təşkil edir, bir-birindən maraqlı intellektual tədbirlər həyata keçirirlər. Öz tərbiyəçiləri və savadlı kadrları ilə seçilən bu bağçada müəllimlər diaqnostik qiymətləndirmə imtahanında yüksək nəticə əldə edirlər. 

Necə deyərlər, "sağlam bədəndə, sağlam ruh olar". Bunun üçün isə öncə sağlam qidalanmaq lazımdır. Çəkiliş apardığımız zaman bağçada uşaqların qidalanmasına xüsusi yanaşıldığını, yeməklərin vaxtlı-vaxtında verildiyini, ərzaqların gigiyenik qaydalara tam əməl olunmaqla hazırlandığını, bir sözlə, normativ tələblərə tam əməl olunduğunu müşahidə etdik. Bağçada mövcud normalara əsasən, zülal, karbohidrat, mineral və vitaminlərin balansı gün ərzində menyuda nəzərdə tutulan qidalara görə tənzimlənir. Uşaqların hansı qidalara allergik olmaları ilə bağlı valideynlərlə dəqiqləşdirmələr aparılır və qidalanma zamanı bu amillər nəzərə alınır. Eyni zamanda gündəlik meyvə, tərəvəz, süd, ət məhsulları, hamısı rasionda bölünmüş və balanslı şəkildə təmin olunur.

Məktəbəqədər təlim-tərbiyə uşaqların gələcəyi üçün zəruri bir başlanğıcdır. Uşağın bu dövrdə necə təhsil alması və hansı təlim-tərbiyə üsulundan keçməsi çox önəmlidir.  Məktəbəqədər yaş dövrü insan şəxsiyyətinin formalaşmasına təsir göstərən əsas mərhələlərdən biridir. Bağçalar da, öz növbəsində, uşağın ətraf aləmlə qarşılıqlı münasibətini təmin etməyə, xeyirxah hisslər oyatmağa, əməkdaşlığa nail olmağa qadir olan məktəbəqədər təhsil müəssisəsidir. Bu baxımdan Ceyranbatan qəsəbə 2 nömrəli körpələr evi uşaq bağçası xüsusilə seçilir və apardığımız müşahidələr onu deməyə əsas verir ki, gələcəyimiz əmin əllərdədir.