Demək olar ki, hər beş sidik yolları infeksiyasından (SYİ) biri heyvani mənşəli qida məhsulları vasitəsilə insana keçən bağırsaq çöpləri (E. coli) ilə əlaqələndirilir. DenMedia.az xəbər verir ki, bu nəticəyə Corc Vaşinqton Universitetinin alimləri gəliblər. Araşdırma mBio jurnalında dərc olunub.
Sidik yolları infeksiyalarına uretrit (sidik kanalının iltihabı), sistit (sidik kisəsinin iltihabı) və pielonefrit (böyrəklərin iltihabı) daxildir. Bu infeksiyalara müxtəlif mikroorqanizmlər — göbələklər, parazitlər, viruslar səbəb ola bilər. Lakin əksər hallarda xəstəliyin əsas səbəbi bakteriyalardır. İnfeksiya adətən törədicinin sidik kanalına düşüb oradan sidik kisəsinə, daha ağır hallarda isə sidik axarı vasitəsilə böyrəklərə yüksəlməsi nəticəsində yaranır.
Tədqiqatçılar 5,7 mindən çox E. coli nümunəsini təhlil ediblər: bir qismi infeksiyalı xəstələrdən, digəri isə mağazalarda satılan ət və quş məhsullarından götürülüb. Genetik analiz göstərib ki, SYİ hallarının təxminən 18%-i heyvani mənşəli bakteriyalarla bağlıdır. Ən çox təhlükəli ştammlar toyuq və hinduşka ətində aşkarlanıb.
Ən yüksək yoluxma riski azgəlirli bölgələrin sakinləri arasında qeydə alınıb — onların E. coli ilə yoluxma ehtimalı varlı rayonların əhalisinə nisbətən 60% daha çoxdur. Alimlər bunu sanitar şəraitin zəifliyi və keyfiyyətli qidaya məhdud çıxış ilə izah edirlər.
Məqalə müəllifləri sistemli tədbirlər görməyə çağırırlar: ət emalı müəssisələrində nəzarətin gücləndirilməsi və sosial bərabərsizliyin azaldılması. İstehlakçılara isə əti yaxşı bişirmək, çiy və hazır yeməklərin təmasını önləmək və hazırlıqdan sonra əlləri yumaq tövsiyə olunur.
