Şəhidlər qürur yerimizdir.Onlar öz şücaətləri ilə ölməzliyi qazanıblar.Bu gün Vətənimizin bütövlüyü, torpaqlarımızın azadlığı uğrunda öz canından keçmiş Abşeron rayon Novxanı kəndindən olan Şəhid Useynov Ceyhun Elşad oğlunun anım günü qeyd edilib.
“Den.az” xəbər verir ki, bu barədə Abşeron rayon İcra Hakimiyyətindən məlumat verilib.
Anım günündə Abşeron Rayon İcra Hakimiyyətinin əməkdaşları, Novxanı kənd İcra Nümayəndəliyi, Şəhidin ailə üzvləri, yaxınları, qazilər, Novxanı kənd təhsil müəssisəsi rəhbərləri və pedoqoji kollektivi, kənd sakinləri iştirak edib.Şəhidin məzarı ziyarət olunub, ruhuna dualar oxunub.
Useynov Ceyhun Elşad oğlu 1990-cı il martın 9-da Abşeron rayonunda anadan olub.Azərbaycan Ordusunun Kapitanı olan Ceyhun Useynov 2020-ci ilin sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Kəlbəcər və Cəbrayıl rayonlarının işğaldan azad olunmasında fəal iştirak edib.Ceyhun Useynov oktyabrın 6-da Cəbrayıl döyüşləri zamanı şəhid olub.Abşeron rayon Novxanı kənd qəbiristanlığında dəfn olunub.Qeyd edək ki, Useynov Ceyhun Elşad oğlu Azərbaycan Respublikası Prezidenti İlham Əliyevin sərəncamına əsasən ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə", "Füzulinin azad olunmasına görə", "Kəlbəcərin azad olunmasına görə", "Azərbaycan Ordusunun 100 illiyi medalı", "Vətən müharibəsi iştirakçısı" və "Şücaətə görə" medalları ilə təltif edilib.
