Xırdalan şəhər 2 nömrəli tam orta məktəbi bu ilki tələbə qəbulu nəticələrində xüsusi uğura imza atıb.
Denmedia.az xəbər verir ki, məktəbin iki məzun sinfinin bütün şagirdləri tələbə adını qazanaraq, həm müəllimlərinin, həm də valideynlərinin qüruruna çevriliblər.
Direktor Gülnaz Kərimova tələbə adını qazanan məzunlara təbriklərini çatdıraraq onların uğurlarının məktəbin pedaqoji kollektivinin fədakar əməyinin nəticəsi olduğunu vurğulayıb. “Bu nailiyyət hər bir müəllimin, hər bir şagirdin zəhmətinin bəhrəsidir. Gənclərimizin ali məktəblərə qəbul olunması bizim üçün ən böyük sevincdir”, – deyə o bildirib.
Məktəbin müəllimləri və valideynlər də şagirdlərin bu uğurunu böyük fərəh hissi ilə qarşılayıblar. 11 il davam edən zəhmətin, bilik və zəkanın nəticəsi olaraq əldə edilən bu göstərici Xırdalan şəhər 2 nömrəli məktəbin təhsil sahəsindəki nüfuzunu bir daha ortaya qoyub.
Bu uğur həm məktəbin, həm də ümumilikdə təhsilə bağlı olan hər kəsin qələbəsidir. Təhsilsevər gənclərin qazandığı nailiyyət ölkənin gələcəyinə inamı daha da gücləndirir.
