Sumqayıt Şəhər Xüsusi Ümumtəhsil Məktəbində “Son Zəng” Çalındı – Məzunlara Unudulmaz Anlar Yaşadıldı
Sumqayıt şəhər Xüsusi Ümumtəhsil Məktəbində ənənəvi “Son zəng” tədbiri keçirilib. Məktəbin həyətində təşkil olunan bu duyğulu mərasimdə Sumqayıt şəhər Bələdiyyəsinin sədri Adil Xudadatov, məktəbin direktoru Arzu Alızadə, müəllim kollektivi, valideynlər və təntənəli şəkildə məzun adını qazanan şagirdlər iştirak ediblər.
Tədbir Azərbaycanın Dövlət Himninin səsləndirilməsi ilə başlayıb. Ardınca məktəbin direktoru Arzu Alızadə tədbir iştirakçılarını salamlayaraq məzunlara təbriklərini çatdırıb. O, çıxışında vurğulayıb ki, bu il məktəbi bitirən şagirdlər öz davranışları, əxlaqları və çalışqanlıqları ilə məktəbin simasını hər zaman ucaldıb. O, müəllimlərin fədakar əməyi nəticəsində yetişən bu gənclərin gələcəkdə də cəmiyyət üçün layiqli vətəndaş olacaqlarına inandığını bildirib.
Daha sonra söz Sumqayıt şəhər Bələdiyyəsinin sədri Adil Xudadatova verilib. O, məzunları bu əlamətdar gün münasibətilə təbrik edərək, xoş arzularını bölüşüb:
Bildirib ki, siz bu gün həyatınızın yeni mərhələsinə qədəm qoyursunuz. Bu məktəb illərində qazandığınız biliklər, dəyərlər və dostluqlar sizin gələcəyinizin təməlidir. Unutmayın, hər biriniz bu cəmiyyətin bir parçası və gələcəyin ümidisiniz. Arzularınızın ardınca inamla gedin, ölkəmizin inkişafına töhfə verəcək, nümunəvi vətəndaş olun. Sumqayıt Bələdiyyəsi olaraq sizin hər zaman yanınızda olmağa çalışacağıq.” deyə Adil Xudadatov bildirib.
Tədbir çərçivəsində Sumqayıt şəhər Bələdiyyəsinin təşəbbüsü ilə məzunlara xüsusi hədiyyələr təqdim olunub. Bu jest tədbirə əlavə sevinc qataraq şagirdlər və valideynlər tərəfindən böyük rəğbətlə qarşılanıb.
Son zəngin sədaları altında məzunlar simvolik şəkildə məktəb həyətində dövrə vuraraq, yeni həyata doğru addımladıqlarını nümayiş etdiriblər. Məzunlar üçün bu gün təkcə məktəblə vidalaşma deyil, eyni zamanda bir başlanğıcdır – arzuların, məqsədlərin, məsuliyyətin başlanğıcı. Onlar üçün bu mərasim həm keçmişə təşəkkür, həm də gələcəyə ümid baxışı idi.
