Masazırda hamilə qadın kanalizasiya sularının içində qaldı-VİDEO

Ətrafdakı evlər çirkab sulara qərq olub, sakinlər isə mənzillərindən bayıra çıxa bilmirlər.
 
“Den.az” xəbər verir ki, görüntülər Abşeron rayonu Masazır qəsəbəsi Paşa Təhməzov küçəsindəndir. 

Sözügedən ərazidə Qır gölünün daşması nəticəsində kanalizasiya suları mənzillərə dolub. Su matorunun işləməməsi isə vəziyyətin daha da acınacaqlı hal alması ilə nəticələnib.

Sakinlər bildirir ki, mövcud problem bir neçə aydır davam edir. Kanalizasiya və qurunt suları küçəyə və evlərə dolduğundan ərazidə hərəkət etmək demək olar ki, mümkünsüz hala çevrilib. Problemlə əlaqədar dəfələrlə aidiyyatı qurumlara şikayət olunsa da, heç bir nəticə yoxdur. Məhəllədə antisanitariya baş alıb gedir.

Ərazidəki evlərin həyətlərini kanalizasiya sularının basması, üstəlik gölün daşaraq ətrafa yayılması nəmişlik yaradıb. Kanalizasiya suyunun səviyyəsi həddindən çox olduğundan azyaşlı uşaqlar ümumiyyətlə məhləyə buraxılmır və məktəbə gedə bilmirlər.

Ən dəhşətlisi budur ki, Masazırda hamilə qadın kanalizasiya sularının içində qalıb. Əraziyə nə təcili tibbi yardım, nə də taksi gəlir. Həyətə düşmək mümkün deyil. 

Abşeron Su və Meliorasiya Sistemlərinin İstismarı İdarəsinin baş mühəndisi Ramil İbadov problemdən xəbərdar olduqlarını bildirib. 
Ümid edirik ki, aidiyyatı qurumlar məsələ ilə bağlı hərəkətə keçəcəklər və sakinlərin problemi qısa zaman ərzində öz həllini tapacaq.