Kanadanın British Columbia əyalətində yerləşən Tumbler Ridge qəsəbəsində baş verən qanlı məktəb hücumu ilə bağlı yeni iddia ortaya çıxıb. Bildirilir ki, hücumu törədən 18 yaşlı Jesse Van Rootselaar (əsl adı Jesse Strang) planlaşdırma mərhələsində ChatGPT kimi süni intellekt alətindən istifadə etmiş ola bilər.
Məlumata görə, 10 fevralda Rootselaar əvvəlcə evində anası Jennifer Strang (39) və 11 yaşlı ögey qardaşı Emmett-i öldürüb.
Bundan sonra o, uzun lüləli silahla əvvəllər oxuduğu, lakin təhsilini yarımçıq qoyduğu Tumbler Ridge məktəbinə hücum edib. Hücum zamanı altı şagird və bir məktəb əməkdaşı həyatını itirib, 27 nəfər isə yaralanıb.
Polisin məktəbi mühasirəyə almasından sonra hücumçu intihar edib. Hücum edən şəxsin uzun müddət psixoloji müalicə aldığı bildirilir.
Hadisə 1989-cu ildə Montreal şəhərində baş verən və 14 nəfərin öldüyü məktəb hücumundan sonra Kanadada ikinci ən ölümcül məktəb hücumu kimi qeydə alınıb.
Məlumata görə, hücum zamanı yaxın məsafədən üç güllə ilə vurularaq ağır beyin zədəsi alan şagirdin ailəsi iddia qaldıraraq OpenAI şirkətini məhkəməyə verib.
Ailə iddia edir ki, hücumçu ChatGPT-dən “sırdaş, köməkçi və müttəfiq” kimi istifadə edib və süni intellektin hücumun planlaşdırılmasına yardım etmiş ola biləcəyini irəli sürür.
