Moskvada məhkəmə çalışdığı evdən bahalı saatlar və pul oğurlayan xadimə ilə bağlı hökm çıxarıb.
RIA Novosti-nin məlumatına görə, qadın məzuniyyətdə olan ailənin evində işləyib və mənzili ev sahiblərinin qayıdışına hazırlamalı olub.
Ev sahibləri mənzili tərk etdikdən sonra xadimə yataq otağına daxil olaraq seyfdən bir neçə bahalı saat götürüb. Oğurlanan əşyalar arasında kişi üçün Rolex Submariner, qadın üçün Rolex DateJust, Cartier və Audemars Piguet saatları olub. Bundan başqa, o, evdən iri məbləğdə pul da götürüb.
Məlumata görə, oğurlanan əşyaların ümumi dəyəri 6 milyon rubla çatıb.
Qadın oğurladığı saatları satmaq üçün lombarda müraciət edib. Orada özünü britaniyalı aristokratın dul həyat yoldaşı kimi təqdim edərək saatların ona və mərhum ərinə məxsus olduğunu bildirib.
Hətta bir neçə günlük Ermənistan və Türkiyə səfərləri zamanı da hər gün ev sahibəsinə “gördüyü işlər” barədə hesabat göndərib. Ev sahibi isə aldadıldığından xəbərsiz şəkildə ona pul köçürməyə davam edib.
Məhkəmədə qadın özünü təqsirli bilməyib. O, saatları lombarda ev sahibəsinin xahişi ilə verdiyini və qadına təcili pul lazım olduğunu iddia edib. Lakin məhkəmə bu arqumentləri qəbul etməyib.
Əvvəlcə qadın xüsusilə külli miqdarda oğurluq və dələduzluq ittihamları üzrə təqsirli bilinib. Məhkəmənin hökmü ilə ona 5 il koloniya cəzası və 100 min rubl cərimə təyin olunub.
Lakin apellyasiya instansiyası dələduzluq maddəsi üzrə cəzanı ləğv edib və bundan sonra məhkum qadın azadlığa buraxılıb.
