Sumqayıtda, Azərbaycanda Qızıl Aypara Cəmiyyətinin yaradılmasının 105 illiyinə həsr olunan tədbir keçirilib.
Den.az xəbər verir ki, tədbirdə Respublika Qızıl Aypara Cəmiyyətinin sədri, millət vəkili Novruz Aslanov, Sumqayıt şəhər İcra Hakimiyyəti başçısının birinci müavini Teymur Səmədov, Qızıl Aypara Cəmiyyətinin Sumqayıt şəhər təşkilatının sdəri Mətanət Məhərrəmova, Sumqayıt Təhsil Sektorunun müdiri İman Ağayev, Azərbaycan Milli Konservatoriya nəzdində Sumqayıt Musiqi Kollecinin kollektivi, idarə və müəssisə rəhbərləri eləcədə şəhər məktəblərindən istedadlı rəssam şagirdlər iştirak ediblər.
Muğam Mərkəzin sərgi salonunda gənc Sumqayıt rəssamlarının fəaliyyətinə həsr olunmuş müsabiqəyə təqdim olunan əsərləri nümayiş etdirilib.
Qızıl Aypara Cəmiyyətinin Sumqayıt təşkilatının sədri Mətanət Məhərrəmova öz fəaliyyətində Ümumdünya Qızıl Aypara Hərəkatının hamı tərəfindən qəbul olunmuş humanizm, neytrallıq, müstəqillik, könüllülük, birlik və universallıq kimi prinsiplərinə söykənən işindən söz açıb. Bir çox xeyriyyə aksiyalarının təşəbbüskarı olan şəhər icra hakimiyyətinin başçısı Zakir Fərəcovun dəstəyini xüsusi vurğulayıb.
Respublika Qızıl Aypara Cəmiyyətinin sədri, Milli Məclisin deputatı Novruz Aslanov ümumdünya humanitar hərəkatın yaranması tarixindən söz açaraq bildirib ki, 90 il əvvəl - 1920-ci il martın 10-da yaradılmış milli cəmiyyət 1995-ci ildən Beynəlxalq Qızıl Xaç və Qızıl Aypara Cəmiyyətləri Federasiyasının tərkib hissəsidir.
Hazırda cəmiyyətin 170 min üzvü və 15 mindən çox könüllüsü var. Fəaliyyətimiz insan və cəmiyyət arasında vəhdətin yaranmasına yönəlib. Novruz Aslanov şəhər icra hakimiyyətinin bu vacib missiyaya böyük kömək və fəal dəstək göstərdiyini vurğulayıb.
Sumqayıt Şəhər İcra Hakimiyyətinin başçısının birinci müavini Teymur Səmədov əvvəlcə şəhər rəhbəri Zakir Fərəcovun salamlarını tədbir iştirakçılarının diqqətinə çatdırıb. Bildirib ki, Sumqayıt təhsili hər zaman birincilər sırasında olub. Bu şəhərdə savadlı , istedadlı şagirdlər nəyinki ölkəmizdə, hətta dünyada öz sözünü deməyi bacarıb. Respublikamızı layiqincə təmsil ediblər. Azərbaycan üçün Beynəlxalq Qızıl Aypara Cəmiyyətinin əhəmiyyətini vurğulayan Teymur Səmədov bildirib ki, sərhədsiz bir təşkilat olan qurumun təyinatı başına fəlakət gələn, ağır vəziyyətdə yaşayan tənha, evsiz-eşiksiz adamlara yardım göstərməkdir. Bütün bunlar xalqımıza xas olan keyfiyyətlərdir. Dövlətimiz məhdud imkanları olan Milli Qızıl Aypara Cəmiyyətinə həmişə diqqət göstərir. Ümummilli lider Heydər Əliyevin təşəbbüsü ilə 1994-cü ildə Milli Məclisdə “Milli Qızıl Aypara Cəmiyyəti haqqında” Qanun qəbul edilib. Dövlətimizin başçısı İlham Əliyevin imzaladığı müvafiq sərəncamlar cəmiyyətə olan qayğını parlaq şəkildə təsdiq edir.
Sonra rəsm sərgisində iştirak edən məktəblilərə hədiyyələr təqdim edilib. Qeyd edək ki, beynəlxalq cəmiyyətin medalı ilə ölkəmizdə ilk dəfə dövlətimizin başçısı İlham Əliyev təltif olunub. Bütövlükdə Beynəlxalq Qızıl Xaç və Qızıl Aypara Cəmiyyətləri Federasiyasına öz sıralarında 128 milyon insanı birləşdirən 186 milli cəmiyyət daxildir.
Den.az
