Sumqayıt polisi öz peşə bayramını belə qeyd etdi-VİDEO

"POLİS XALQIMIZA, MÜSTƏQİL AZƏRBAYCAN DÖVLƏTİNƏ, ONUN HƏR BİR VƏTƏNDAŞINA XİDMƏT EDİR".
 
Ulu Öndər, müasir Azərbaycanın qurucusu Heydər Əliyevin səsləndirdiyi bu fikirlər Azərbaycanın daxili işlər orqanlarına, xalqın keşiyində dayanan polis əməkdaşlarına verilən dəyərin ən bariz nümunəsi sayıla bilər. Hər zaman dövlətə və dövlətçiliyə xidmət edən Azərbaycan polisi bu gün də öz üzərinə düşən vəzifəni layiqincə yerinə yetirir. Cinayətkarlıqla mübarizə sahəsində atılan addımların nəticəsidir ki, hər bir Azərbaycan vətəndaşı özünü təhlükəsizlikdə hiss edir.
 
Bu gün dövlətin və xalqın keşiyində əzmlə dayanan Azərbaycan polisi öz peşə bayramını qeyd edir.
 
Den.az xəbər verir ki, Sumqayıt şəhər İcra Hakimiyyətinin başçısı Zakir Fərəcov və hər zaman öz çevikliyi və nümunəviliyi ilə seçilən Sumqayıt polisinin rəhbər heyəti eləcədə əməkdaşları peşə bayramlarına Ümummilli lider Heydər Əliyevin abidəsini ziyarət etməklə başlayıblar. 
 
Daha sonra 2 iyul Azərbaycan polisinin peşə bayramı münasibətilə keçirilən tədbirdə çıxış edən Sumqayıt şəhər Polis İdarəsinin rəisi Fəqan Azadəliyev Daxili İşlər Naziri Vilayət Eyvazovun salamını və təbrikini şəxsi heyətə çatdırıb. Fəqan Azadəliyev bildirib ki, Azərbaycan polisi insan hüquq və azadlıqlarının qorunmasına həssaslıqla yanaşır. Bu gün vətəndaş inanır ki, onun hüquq və azadlıqlarının, təhlükəsizliyinin, sağlamlığının, mülkiyyətinin keşiyində dövlət orqanları dayanır. İdarə rəisi ictimai təhlükəsizliyin təmin edilməsində polisin rolunun əvəzedilməz olduğuna diqqət çəkib. Bildirib ki, polis öz qanı, canı bahasına Azərbaycan vətəndaşını müdafiə edir. Bir sözlə, Azərbaycan polisi Azərbaycan vətəndaşını qoruyur. 
 
Tədbirdə çıxış edən Sumqayıt şəhər İcra Hakimiyyətinin başçısı Zakir Fərəcov 1918-ci il iyulun 2-də Azərbaycan Xalq Cümhuriyyəti hökumətinin qərarı ilə təsis edilən polis orqanlarının bu il ərzində uzun tarixi bir yol keçdiyinə diqqət çəkib. Bildirib ki, 90-cı illərin əvvələrində ölkədə xaos və hərc-mərclik baş qaldırdığı bir vaxtda yalnız ulu öndərin müdaxiləsi ilə Azərbaycanda sabitlik bərpa olundu və Azərbaycanda qanunun aliliyi təmin edildi. Cəmiyyətdə sabitliyin təmin olunmasında Daxili İşlər NAzirliyi mühüm rol oynadı. İcra başçısı əlavə edib ki, İlham Əliyevin Azərbaycan Prezidenti seçilməsi ilə ölkəmiz inkişafının yeni mərhələsinə qədəm qoyub. Polis ictimai-siyasi sabitliyin rəmzinə çevrilib. Bu gün Azərbaycan polisi Azərbaycan dövlətinin mühüm dayağıdır.
 
Çıxışlardan sonra Sumqayıt polisinin xidmətdə fərqlənən bir qrup əməkdaşı təltif edilib.