Sumqayıtda "İlham Əliyev Sumqayıt şəhərinin sürətli sosial-iqtisadi inkişafının qarantıdır" adlı konfrans keçirilib - VİDEO

"Sumqayıtın şəhər kimi formalaşması və inkişafı bilavasitə müasir Azərbaycanın qurucusu, Ulu Öndər Heydər Əliyevin adı ilə bağlıdır. Şəhərin sosial-iqtisadi inkişafının pik həddə çatması, günü-gündən gözəlləşməsi və abadlaşması isə Prezident İlham Əliyevin Sumqayıta göstərdiyi xüsusi diqqət və qayğının nəticəsidir".

Bu fikirlər Sumqayıtın 75 illik yubileyinə həsr olunan "İlham Əliyev Sumqayıt şəhərinin sürətli sosial-iqtisadi inkişafının qarantıdır" adlı elmi-praktiki konfransda səsləndirilib.

Tədbirdə Sumqayıt şəhər İcra Hakimiyyətinin başçısı Zakir Fərəcov, idarə, müəssisə və təşkilat rəhbərləri, şəhərin sahibkarlıq subyektlərinin təmsilçiləri, eləcə də ictimaiyyət nümayəndələri və ziyalılar iştirak ediblər. 

Konfransdan öncə Sumqayıtın sürətli sosial-iqtisadi inkişafına dair sərgi təşkil olunub. Qeyd edək ki, sərgidə şəhərin bütün sahibkarlıq subyektləri, iri zavod və fabrikləri öz istehsal etdikləri məhsulları əks etdirən stendlərlə iştirak ediblər. Sumqayıt şəhər İcra hakimiyyətinin başçısı Zakir Fərəcov sərgiyə baxış keçirib və sərgilənən məhsullarla tanış olub. 

Daha sonra elmi-praktik konfrans öz işinə başlayıb. 

Konfransda çıxış edən Sumqayıt şəhər İcra Hakimiyyətinin başçısı Zakir Fərəcov noyabr ayında şəhərin 75 illik yubileyinin keçiriləcəyini xatırladıb. Bu rəqəmin çox da böyük olmadığını deyən icra başçısı, Sumqayıtın az müddətdə çox böyük və şərəfli yol keçdiyini diqqətə çatdırıb. Şəhərin yaranmasından və formalaşmasından danışan Zakir Fərəcov Ulu Öndər Heydər Əliyevin danılmaz zəhmətindən və əməyindən söz açıb. Bildirib ki, ümummilli lider Heydər Əliyev Sumqayıta 16 dəfə səfər edib və hər səfəri şəhərdə yeni müəssisələrin, istehsal sahələrinin, məhəllələrin açılması ilə müşayiət olunub. Zakir Fərəcov şəhərin sürətli inkişafının Ulu Öndərin layiqli davamçısı, Prezident İlham Əliyevin adı ilə bağlı olduğunu xüsusi vurğulayıb. Bildirib ki, bir zamanlar köhnə sənaye müəssisələrinin fəaliyyəti ilə çirkli şəhərə çevrilən Sumqayıt artıq yaşıllıqlar içərisində olan dünyanın ən təmiz şəhərələrindən biridir. Buna səbəbölkə başçısı İlham Əliyevin tapşırıqlarına uyğun olaraq köhnə və istismar müddətini başa vuran müəssisələrin sökülərək yeni və ən müasir standartlara cavab verən fabrik və zavodların tikilməsi, sənaye parklarının və zonalarının yaradılmasıdır. Eyni zamanda Sumqayıtda istismar müddətini başa vuran 600-dən çox lift yenisi ilə əvəzlənib ki, bu da sakinlərin rifah halının yaxşılaşdırılmasına xidmət edir. Bir sözlə, Sumqayıtın gözəlləşməsi və abadlaşması Prezident İlham Əliyevin şəhərimizə göstərdiyi xüsusi diqqət və qayğısının nəticəsidir.

Daha sonra konfransda çıxış edən Sumqayıt Dövlət Universitetinin professoru Şəfa Əliyev, Azərkimya İstehsalat Birliyinin baş direktoru Elnur Məmmədli, SOCAR Polymer MMC-nin direktoru Fuad Əhmədov, "Qartal" tikinti şirkətinin rəhbəriŞahin Məmmədov, FHN Sumqayıt Regional İdarəsinin rəisi Vaqif Fətullayev və digərləri Sumqayıtın tarixindən, keçdiyi inkişaf mərhələsindən söz açıblar. Bildirilib ki, 1970-1985-ci illərdə məhz Ulu Öndər Heydər Əliyevin gərgin əməyi sayəsində Sumqayıt özünün inkişafının intibah dövrünü yaşayıb. Belə ki, şəhərin sənaye potensialı güclənib və yeni müəssisələr yaradılıb. 1993-2003-cü illərdə Ulu Öndər ikinci dəfə hakimiyyətə qayıtdıqdan sonra isə Sumqayıt şəhər kimi daha da inkişaf edib. Prezident İlham Əliyev bu işıqlı yolu daha da aydınladaraq Sumqayıtın sürətli inkişafına çox böyük töhfə verib, rəqabətqabiliyyətli ölkə yaradıb və Azərbaycanı regionun ən güclü dövlətinə çevirməyi bacarıb. Hazırda Azərbaycan enerji sahəsində dünyaya böyük töhfələr verir və öz iqtisadi qüdrəti sayəsində beynəlxalq arenada tanınır. Eyni zamanda Azərbaycan separatizmin kökünü kəsərək qalıb ölkəyə çevrilib və bu, bizim hərbi gücümüzün göstəricisi kimi qəbul olunmaqdadır. Çıxışçılar Azərbaycanın qlobal problemlərin həllinə töhfə verən dövlət kimi tanındığını, COP29-un ölkəmizdə keçirilməsinin bunun bariz nümunəsi sayıldığını vurğulayıblar. Sonda bir daha qeyd olunub ki, Prezident İlham Əliyev Sumqayıtın sosial-iqtisadi inkişafına daha çox diqqət yetirir, sənaye potensialının güclənməsinə təkan verir. Bütün atılan addımlar isə yalnız və yalnız sumqayıtlıların rifah halının yaxşılaşdırılmasına xidmət edir.