Sumqayıtdakı 15 nömrəli məktəbin təhsil uğurlarının sirləri-VİDEO

Azərbaycan xalqının böyük ədibi Hüseyn Cavid deyirdi ki, bir millətin tərəqqisini və inkişafını görmək üçün həmin millətin məktəblərinə nəzər yetirmək kifayət edər. Avropaya meydan oxuyan Almaniyanın, qoca Rusiyanı həyəcana salan Yaponiyanın bütün tərəqqisi məktəblər sayəsindədir. Bir millətin kimliyini tədqiq edib öyrənmək üçün məktəbi ən doğru meyar hesab edən Hüseyn Cavid, əlbəttə, haqlı idi. Bu həqiqət bu gün də öz aktuallığını itirməyib. Məktəb cəmiyyətin ictimai şüur barometri və mənəviyyat aynasıdır. Cəmiyyətin mənəvi sağlamlığı məhz məktəbdən qaynaqlanır. Milli tərəqqinin, elmi-intellektual yüksəlişin hər bir ailədən başlayan cığırı məhz məktəbdən keçməklə zirvəyə doğru hərəkət edir. Ona görə də məktəb öz qapısından, sinif otağından tutmuş orada fədakarlıqla çalışan müəllimlərinə qədər bütün varlığı ilə müqəddəs bir ocaqdır. Öncə insan, sonra vətənpərvər şəxsiyyət və yüksək elmli və savadlı gənclik yetişdirməyi əsas prioriteti hesab edən təhsil ocaqlarından biri də, Abşeron-Xızı Regional Təhsil İdarəsinin tabeliyində olan və Sumqayıtda yerləşən 15 nömrəli tam orta məktəbidir.

Texnoloji proseslərin sürətlə dəyişdiyi bir dünyada hər bir xalqın gələcəyi, ilk növbədə, onun təhsil və elm sahəsindəki uğurlarından asılıdır. Çəkiliş apardığımız 15 nömrəli tam orta məktəbin uğurları da kifayət qədərdir. Direktor Elmira Yaqubovanın sözlərinə görə, 1966-cı ildən fəaliyyət göstərən təhsil ocağında vətənpərvərlik hisslərini aşılayan, şəhidlərimizi, qəhrəmanlarımızı tanıdan foto guşələrin yaradılmasına çox böyük önəm verilir. Eyni zamanda doğma şəhərimiz olan Sumqayıtın tarixinin müəyyən simvollarını özündə əks etdirən foto stendlərin qoyulması burada təhsil alan şagirdlər tərəfindən çox böyük maraqla qarşılanır.

Sözügedən məktəbdə işini sevən və peşəkarlığı ilə diqqət çəkən müəllimlərin fəaliyyət göstərməsi burada təhsil alan şagirdlərin davranışından, nizam-intizamından, verilən tapşırıqları cəld yerinə yetirməsindən dərhal hiss olunur. Dərslər fərqli üsulla, şagirdlərdə müxtəlif fənnlərə sevgi aşılamaqla keçilir. Eyni zamanda "Yaşıl Dünya Naminə Həmrəylik İli" ilə bağlı dərslərin keçirilməsi, hərbi fənnin yüksək səviyyədə tədris olunması, şagirdlərin xüsusi geyim və formalarla dərs prosesinə cəlb olunması yalnız və yalnız yüksək peşəkarlıqdan və işini sevən rəhbərliyin, eləcə də pedaqoji kollektivin olmasından xəbər verir. 

Bu gün hər bir təhsilalan gələcəyin qurucusudur. Odur ki, dövlətimizin diqqət və qayğısına cavab olaraq müəllimlər çalışmalıdır ki, şagirdlər yalnız elmin sirlərinə bələd gənclər kimi ictimai fəaliyyət meydanına atılmasınlar. Onlar həm də mənəviyyatca saf, əxlaqca kamil, vətənpərvər bir şəxsiyyət kimi formalaşaraq vətənə və dövlətə layiqli xidmət etsinlər. Abşeron-Xızı Regional Təhsil İdarəsinin tabeliyində olan bütün təhsil müəssisələri məhz bu prinsipləri prioritet hesab edərək yorulmadan fəaliyyət göstərir.