Sumqayıtda “Sağlam təhsil – sağlam millət” layihəsinin sinifləri yalnız bu məktəbdədir-VİDEO

Beynəlxalq Şagird Qiymətləndirməsi proqramının yaradıcısı Andreas Şleyxer deyirdi ki, “Bu günün məktəbi sabahın cəmiyyətidir. Bu gün məktəbimiz necədirsə, sabah cəmiyyətimiz də elə olacaq”. Əlbəttə ki, Tarix boyu insanın inkişafı hər zaman pedoqoqların, psixoloqların, insan mühəndislərinin diqqət mərkəzində olub. Bu diqqət həm də arzuolunan insan şəxsiyyətinin formalaşdırılmasının nə qədər önəmli olduğunu ön plana çəkib. Sağlam xarakterə malik şəxsiyyətin formalaşdırılması ailənin, məktəbin və cəmiyyətin əsas hədəflərindən biri hesab olunur. Bunun həyata keçirilməsində isə məktəbin rolu xüsusilə önəmlidir. İnsan dünyaya gözünü ailədə açsa da, onun cəmiyyətə inteqrasiyası məktəbdə baş verir. Məktəb akademik biliklərin verilməsi ilə yanaşı, həm də insana xas olan digər özəlliklərin vətənpərvərlik, humanizm, paylaşmaq, tolerantlıq və digər hisslərin formalaşdırılmasında olduqca əhəmiyyətlidir. Sadalanan bu xüsusiyyətlər Abşeron-Xızı regional Təhsil İdarəsinin tabeliyində fəaliyyət göstərən bütün təhsil müəssisəslərinin başlıca vəzifəsi hesab olunur. Bu vəzifəni layiqincə yerinə yetirən, cəmiyyətə həm savadlı kadr, həm də uğurlu şəxsiyyət təqdim edən təhsil müəssisələrindən biri də Sumqayıt şəhərində yerləşən Yusif Məmmədəliyev adına 31 saylı tam orta məktəbdir. 
 
Qeyd edək ki, 31 nömrəli tam orta məktəb 1984 cü ildə istifadəyə verilib. Təhsil müəssisəsində 92 nəfər pedaqoji heyət, 30 texniki işçi çalışır. 
60 sinif, 4 məktəbə hazırlıq, 1 fərdi təhsil,  3 icma əsaslı məktəbə qədər təhsilin inkişafı qurupları fəaliyyət göstərir. 1və 4-cü siniflər arasında 8 sağlam təhsil sinifi var ki, bu da Sumqayıt məktəbləri arasında bir ilkdir. Belə ki, "sağlam təhsil sağlam millət" layihəsi əsasında yaradılan bu siniflərdə şagirdlər növbəli şəkildə, yəni hər 15 dəqiqədən bir yerdəyişmə edərək parta arxasında əyləşirlər. Hər sinifdə 24 şagird təhsil alır. Məqsəd isə uşaqların sağlam qamətlərinin formalaşmasını təmin etməkdir ki, təhsil müəssisəi məhz sözügedən layihə nəticəsində buna nail olmağı bacarır. Məlumat üçün bildirək ki, Azərbaycan Respublikası Təhsil Nazirliyinin “Pilot layihənin həyata keçirilməsi barədə” 14 may 2014-cü il 591 nömrəli əmrinə əsasən Sumqayıt 31 N-li məktəbdə təhsilalanların sağlamlığının qorunması və təlim nailiyyətlərinin yüksəldilməsi məqsədi ilə layihə fəaliyyətə başlayıb.
 
Məktəblərin yuxarıda qeyd olunan ali missiyaları ilə yanaşı, həm də formal təhsil vermək kimi vəzifəsi var. Bu iki önəmli prosesin birgə həyata keçirilməsi gələcəyin insan kapitalının dəyərini daha da artırır. Təhsil prosesindən, xüsusən də məktəbdən danışarkən şəxsiyyətin formalaşmasında müəllimin rolunu nəzərə almamaq olmaz. Ailədən sonra məktəb olduğu kimi, valideynlərdən sonra da uşaqlar üçün nümunə müəllimləridir. Sumqayıt şəhər 31 nömrəli tam orta məktəbin bütün müəllimləri həm peşəkarlıq, həm də insani xüsusiyyətlər baxımından xüsusilə fərqlənir. 
Ailəmizlə cəmiyyətimiz arasında ən yaxşı, sağlam körpü məktəb olmalıdır. Dünyanı anlayan, dəyərini bilən və daha yaxşı gələcəyi formalaşdırmaq üçün çalışan, sadəcə öz ölkəsinin deyil, dünyanın vətəndaşı olmağı hədəfləyən insan kapitalının formalaşdırılmasının yolu təhsildən, məktəbdən keçir. Abşeron-Xızı RegionalTəhsil İdarəsinin tabeliyində fəaliyyət göstərən bütün təhsil müəssisələri öz işlərinin öhdəsindən layiqincə gəlməyi bacarır.