14 ildə 13 dəfə çempion olan məktəbi tanıyaq-VİDEO

Məktəb öz qapısından, sinif otağından tutmuş orada fədakarlıqla çalışan müəllimlərinə qədər bütün varlığı ilə müqəddəs bir ocaqdır. Çünki hər bir təhsil müəssisəsi öncə insan, sonra vətənpərvər şəxsiyyət və yüksək elmli və savadlı gənclik yetişdirməyi əsas prioriteti hesab edir. Həm təhsilin keyfiyyəti və qazanılan uğurlar, həm də savadlı pedaqoqları ilə fərqlənən təhsil müəssisələrindən biri də Abşeron-Xızı Regional Təhsil İdarəsinin tabeliyində olan Aşağı Güzdək qəsəbə tam orta məktəbidir.

Təhsilin başlıca məqsədi cəmiyyət üçün zəruri və faydalı şəxsiyyətin, yüksək mənəvi potensiala malik insanın formalaşmasıdır. Güzdək qəsəbə tam orta məktəbin kollektivi qarşıya məhz bu məqsədi qoyub. Dərslərin interaktiv üsulla keçirilməsi, siniflərdəki nizam-intizam, müəllimlərin fərqli və maraqlı metodlarla öz fənnlərini tədris etməsi bunun əyani sübutudur. Sözügedən məktəbdə işini sevən və peşəkarlığı ilə diqqət çəkən müəllimlərin fəaliyyət göstərməsi burada təhsil alan şagirdlərin davranışından, nizam-intizamından, verilən tapşırıqları cəld yerinə yetirməsindən dərhal hiss olunur. Bütün bunların nəticəsidir ki, Aşağı Güzdək tam orta məktəbi öz təhsil uğurları ilə seçilir.

Qeyd edək ki, məktəb 1951-ci ildən fəaliyyət göstərir, 2013-cü ildə isə köməkçi korpus tikilərək istifadəyə verilib. Təhsil müəssisəsində 1653 şagird təhsil alır. Onların təlim tərbiyəsi ilə pedaqoji və texniki heyət olmaqla 114 nəfər məşğul olur. Məktəbin uğurları da saymaqla bitmir. Belə ki, ötən tədris ilində məktəbin 3 məzunu 600 dən çox bal toplayıb. Mikayılov Elcan 623 balla İqtisad Universitetinə, Xəlil Şahverdiyev isə Qarabağ universitetinə qəbul olub. Bundan başqa 11-ci sinif şagirdi Zulfuqarova Əsmər qızıl atesstat və qızıl medala layiq görülüb. Məktəbin 9-cu siniflərində 4, 11-ci siniflərində isə 8 şagird qırmızı atesstat alıb. 5-ci sinif şagirdi Atakişizadə Yusif riyaziyyat və məntiq olimpiadasında bürünc medal qazanıb. 10 D sinif şagirdi Validə Məmmədəliyeva isə Fransız boksu idman növü üzrə Azərbaycan çempionu olub, həmçinin Milli komandanın üzvüdür. Məktəb Abşeron rayonu üzrə keçirilən voleybol yarışlarında indiyədək 14 görüşdən 13-də qalib gələrək çempion adını qazanıb. Bütün bunlar direktor Xuraman Kərimovanın rəhbərliyi altında məktəbin şagirdlərinin qazandığı uğurların yalnız bir hissəsidir.

Bu gün hər bir təhsilalan gələcəyin qurucusudur. Odur ki, dövlətimizin diqqət və qayğısına cavab olaraq müəllimlər çalışmalıdır ki, şagirdlər yalnız elmin sirlərinə bələd gənclər kimi ictimai fəaliyyət meydanına atılmasınlar. Onlar həm də mənəviyyatca saf, əxlaqca kamil, vətənpərvər bir şəxsiyyət kimi formalaşaraq vətənə və dövlətə layiqli xidmət etsinlər. Abşeron-Xızı Regional Təhsil İdarəsinin tabeliyində olan bütün təhsil müəssisələri məhz bu prinsipləri prioritet hesab edərək yorulmadan fəaliyyət göstərir.