Sumqayıtda bu məktəbin 25 illiyi şəhərin 75 illik yubileyinə təsadüf edir-VİDEO

Cəmiyyətin mənəvi sağlamlığı məhz məktəbdən qaynaqlanır. Milli tərəqqinin, elmi-intellektual yüksəlişin hər bir ailədən başlayan cığırı məhz məktəbdən keçməklə zirvəyə doğru hərəkət edir. Ona görə də məktəb öz qapısından, sinif otağından tutmuş orada fədakarlıqla çalışan müəllimlərinə qədər bütün varlığı ilə müqəddəs bir ocaqdır. Öncə insan, sonra vətənpərvər şəxsiyyət və yüksək elmli və savadlı gənclik yetişdirməyi əsas prioriteti hesab edən təhsil ocaqlarından biri də, Abşeron-Xızı Regional Təhsil İdarəsinin tabeliyində olan və Hacı Zeynalabdin qəsəbəsində fəaliyyət göstərən 32 nömrəli tam orta məktəbidir. 

Sözügedən məktəbə ilk ayaq basan andan burada sözün əsl mənasında gələcəyin elmli, savadlı və ən əsası vətənpərvər gənclərinin yetişdirildiyini görmək olur. Çünki təhsil müəssisəsində şagirdlərə yüksək səviyyədə elmi bilikləri aşılamaqla yanaşı, həm də vətən uğrunda canını fəda edən şəhidlərimiz, milli qəhrəmanlarımız, dövlət və ictimai-siyasi xadimlərimiz da tanıdılır. Onların fotolarının məktəbin foyesində əks olunması bunun bariz nümunəsi sayıla bilər. Məktəbdə dərslər isə yüksək peşəkar pedaqoqlar tərəfindən interaktiv üsulla keçirilir. Elə bunun nəticəsidir ki, 32 nömrəli tam orta məktəb öz uğurları ilə Sumqayıtın digər təhsil müəssisələri arasında xüsusilə seçilir.

Direktor Fəzilə Mahmudova təhsil müəssisəsində 806 şagirdin təhsil aldığını bildirib. Onların təlim-tərbiyəsi ilə 56 pedaqoji heyət və 20 texniki işçi məşğul olur. Ən maraqlı məqam isə odur ki, məktəbin 25 illiyi Sumqayıtın 75 illik yubileyi ilə üst-üstə düşür. Direktorun sözlərinə görə, məktəbdə COP29 və digər ölkədaxili və beynəlxalq tədbirlərlə bağlı maraqlı məşğələlər keçirilir. Təhsil müəssisəsi "Yaşıl Dünya Naminə Həmrəylik İli"nə öz töhfəsini verərək, bu istiqamətdə bir sıra uğurlu tədbirlərə imza atıb.

Bu gün hər bir təhsilalan gələcəyin qurucusudur. Odur ki, dövlətimizin diqqət və qayğısına cavab olaraq müəllimlər çalışmalıdır ki, şagirdlər yalnız elmin sirlərinə bələd gənclər kimi ictimai fəaliyyət meydanına atılmasınlar. Onlar həm də mənəviyyatca saf, əxlaqca kamil, vətənpərvər bir şəxsiyyət kimi formalaşaraq vətənə və dövlətə layiqli xidmət etsinlər. Abşeron-Xızı Regional Təhsil İdarəsinin tabeliyində olan bütün təhsil müəssisələri məhz bu prinsipləri prioritet hesab edərək yorulmadan fəaliyyət göstərir.