"Azərbaycanın şanlı tarixinə parlaq, qürurverici 8 noyabr günü qızıl hərflərlə daxil oldu. Uzun illər boyu xalqımız bu tarixi ədalətin təntənəsini gözləyirdi. 44 günlük Vətən Müharibəsi və tarixi qələbəmiz Azərbaycan xalqının nəyə qadir olduğunu göstərdi.
Bu fikirlər Sumqayıt şəhəri Sağlamlıq İmkanları Məhdud Uşaqlar üçün xüsusi məktəbdə keçirilən, Sumqayıtın 75 illik yubileyinə və "Zəfər Günü"nə həsr olunan tədbirdə səsləndirilib.
Məktəbin Azərbaycan dili və Ədəbiyyat müəllimlərinin təşkilatçılığı ilə keçirilən "Xarı Bülbül Qoxulu Zəfər" tədbirində məktəbin pedaqoji kollektivi və şagirdləri, qazilər və şəhid ailələri, Sumqayıt şəhər İcra Hakimiyyətinin və Abşeron-Xızı Regional Təhsil İdarəsinin nümayəndələri iştirak ediblər.
Öncə məktəbin müəllim və şagirdlərinin əl işlərindən ibarət sərgiyə baxış keçirilib.
Tədbir Azərbaycanın dövlət himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə açıq elan olunub.
Ardınca "Zəfər Günü" ilə bağlı videoçarx nümayiş etdirilib. Tədbirdə çıxış edən Sumqayıt şəhəri Sağlamlıq İmkanları Məhdud Uşaqlar üçün xüsusi məktəbin direktoru Arzu Alızadə bizə şanlı Zəfəri yaşadanlara mənən borclu olduğumuzu xatırladıb. Bildirib ki, Qarabağın tacı olan Şuşamızın azad edilməsi tam qələbəmizi müjdələyən zəfər oldu. Azərbaycan Böyük Qələbənin ilk addım səslərini məhz noyabrın 8-də Şuşa şəhərinin işğaldan azad edildiyi ilk saatlarda eşitdi. Bu qədim yurd yerimizin xilası ilə tam qələbəmizə yol açıldı. Bu gün biz qalib ölkənin vətəndaşlarıyıq. Hər bir Azərbaycan vətəndaşı bu tarixi qələbənin şahidi olduğu üçün çox xoşbəxtdir. Buna görə xalqımıza bu xoşbəxtliyi və tarixi qələbə sevincini yaşadan Müzəffər Ali Baş Komandana və ordumuza borcluyuq.
Ardınca tədbirdə çıxış edən Sumqayıt şəhər İcra Hakimiyyətinin baş məsləhətçisi Mehriban Nəcəfova 8 Noyabr – Zəfər Gününün xalqımızın qürur mənbəyinə çevrildiyini diqqətə çatdırıb. Bildirib ki, Vətən müharibəsində Azərbaycan xalqı öz liderinin - müzəffər Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi.
Tədbirdə çıxış edən Vətən Müharibəsi şəhidi Şəhriyar Quliyevin anası Xalidə Quliyeva bildirib ki, 44 gün davam edən hərbi əməliyyatlar nəticəsində rəşadətli ordumuz erməni əsarətində olan torpaqlarımızı azadlığına qovuşdurdu. Noyabrın 8-də uzun sürən həsrətdən sonra Azərbaycan xalqı üçün böyük əhəmiyyət kəsb edən və rəmzi məna daşıyan Şuşa şəhəri işğaldan azad edildi. Bu gün də xalqımız qüdrətimizin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbəni yüksək səviyyədə qeyd edir. Ona görə də, bu qələbəni təmin edən, bizə zəfər yaşadan şəhidlərimizi heç zaman unutmamalıyıq.
Tədbir məktəbin şagirdlərinin vətənpərvərlik ruhda hazırladıqları bədii kompazisiyalarla davam etdirilib.
"Xarı Bülbül Qoxulu Zəfər" tədbirindən möhtəşəm görüntülər-VİDEO
Xəbər xoşunuza gəlib? Sosial şəbəkələrdə paylaşın
Digər xəbərlər
Son xəbərlər, Azərbaycanda və Dünyada ən aktual hadisələr Oxu.az Xəbər Saytında
“Global Media Group”a daxil olan Oxu.Az xəbər saytı 2013-cü ilin iyul ayından fəaliyyət göstərir. Saytın yaradılmasında məqsəd dünyada və ölkədə baş verən ən vacib və maraqlı son xəbərləri geniş auditoriyaya təqdim etməkdir.
Oxu.Az 24 saat ərzində, Azərbaycan və rus dillərində, ölkədə və dünyada baş verən ən aktual və maraqlı son xəbərlər barədə operativ məlumatlar, oxucuları və cəmiyyəti maraqlandıran suallara cavablar, analitik məqalələr, foto və videohesabatlar hazırlayır.
Düzgün seçilmiş informasiya siyasəti, müasir dizaynı, mobil platformalarda və aparıcı sosial şəbəkələrdə təmsil olunması nəticəsində bu gün Oxu.Az Azərbaycanın media məkanında öz layiqli yerini tutub və ən geniş oxucu auditoriyasına malik xəbər portallarından birinə çevrilib.
