ABŞ-nin Kolorado ştatında ayı evə girərək yatmış 17 yaşlı qızın yataq otağına daxil olub.
ABC News-un məlumatına görə, ayı yarıaçıq pəncərəni itələyərək açıb, qoruyucu toru qoparıb və otağa girib.
Yeniyetmə otaqda heyvanın olduğunu hiss edərək yuxudan oyanıb və qorxudan yorğanın altında gizlənib. Lakin ayı ona pəncəsi ilə qarın nahiyəsindən zərbə endirib. Qızın bədənində üç cızıq izi qalıb.
Yeniyetmə qışqırmağa başlayıb. Ayı əvvəlcə pəncərədən çölə çıxsa da, az sonra yenidən otağa qayıdıb. Bu zaman qız yüksək səslə qışqırmağa davam edərək yataqdan qalxıb və ayıya qarşı müqavimət göstərərək onu evdən çıxarmağa nail olub.
Vəhşi təbiətin mühafizəsi üzrə dairə meneceri Lyuk Klensi bildirib ki, yeniyetmənin üzərində bir neçə yorğanın olması onu daha ciddi xəsarətlərdən qoruya bilərdi.
“Ayı ona zərbə endirəndə üzərində bir neçə yorğanın olması böyük şans idi”, – Klensi bildirib.
