Ötən tədris ilinin sonunda Sumqayıt şəhəri üzrə 3789 nəfər ümumtəhsil məktəblərinin 11-ci sinfini bitirərək məzun olmuşdurlar. Onlardan 157 nəfəri təhsilini əla qiymətlərlə başa vuraraq məktəbi fərqlənmə attestatı ilə, 19 nəfər isə təhsildə xüsusi nailiyyətlərinə görə qızıl və gümüş nişanla bitirmişdir.
"Den.az"xəbər verir ki, bu barədə Sumqayıt şəhərində yüksək bal toplayan məzunlarla keçirilən görüşdə bildirilib.
Təşkil edilən görüşdə Sumqayıt şəhər İcra Hakimiyyətinin başçısı Zakir Fərəcov, Abşeron -Xızı Regional Təhsil İdarəsinin müdiri İlhamə Abdullayev, Millət Vəkili Müşfiq Məmmədli, təhsil işçiləri, şəhid övladları və bu il tələbə qəbulunda yüksək bal toplayan məzunlar iştirak ediblər.
Sumqayıt şəhər İcra Hakimiyyətinin başçısı Zakir Fərəcov, Abşeron-Xızı Regional Təhsil İdarəsinin müdiri İlhalə Abdullayeva çıxış edərək məzunları təbrik ediblər. Onlara gələcək işlərində uğurlar arzulayıblar.
Bildirilib ki, məzunlardan 3015 nəfəri ali təhsil müəssisələrinə sənəd vermiş, onlardan 2448 nəfəri ali təhsil müəssisələrinə qəbul olunaraq tələbə adını qazanmışdır. Beləliklə bu il ali təhsil müəssisələrinə qəbul faizi şəhər üzrə 81% olmuşdur. Onu da qeyd edək ki, qəbul imtahanında iştirak edən məzunlarımızdan 130 nəfər 600-dən yuxarı, onlardan 26 nəfəri iəs 650-dən yuxarı bal toplamışdır.
Məktəblər üzrə təhlil apararsaq 650-dən yuxarı bal toplayanlar arasında ilk 3 yeri 11 nəfərlə Təbiət elmləri təmayüllü gimnaziya, digər yerləri isə 2 nəfərlə Təfəkkür liseyi və 30 nömrəli tam orta məktəb tutur.
600-dən yuxarı bal toplayanlar arasında isə ilk yeri 31 nəfərlə yenə Təbiət elmləri təmayüllü gimnaziya, digər yerləri isə 8 nəfərlə Texniki və təbiət elmləri liseyi, 35 və 11 nömrəli tam orta məktəblər tutur.
Təbii ki, məktəblərin uğurları yalnız universitetlərə qəbulla yekunlaşmır. Qeyd edək ki, ötən tədris ilində şagirdlərimiz Respublika Fənn Olimpiadalarında da fəal iştirak edərək yüksək nəticələr göstərmişdirlər. Belə ki, Sumqayıt şəhəri üzrə 40 nəfər şagird olimpiada qalibi olaraq müxtəlif medallar qazanmışdılar. Onlardan 8 nəfər qızıl, 16 nəfər gümüş, 16 nəfər isə bürünc medala layiq görülmüşdür. Olimpiada qalibi olan şagirdlərin 23 nəfəri Təbiət elmləri təmayüllü gimnaziyanın, 7 nəfəri isə 23 nömrəli tam orta məktəbin şagirdləridir.
Qeyd edək ki, 2022-ci ildə Respublika Fənn Olimpiada qaliblərin sayı 19 nəfər olmuş, 2023-cü ildə isə bu say iki dəfədən də çox artaraq 40 nəfərə qalxmışdır.
Bundan başqa Respublika səviyyəli digər müsabiqələrdən biri olan “Sabahın alimləri” müsabiqəsində məktəblərimizin 6 layihəsi medala layiq görülmüşdür. Onlardan İstedad liseyi 1 qızıl medal, Təbiət elmləri təmayüllü gimnaziya 1 gümüş, 1 bürünc medal, Texniki və təbiət elmləri liseyi və TET gimnaziya birlikdə 1 gümüş medal, 1 nömrəli tam orta məktəb 1 gümüş medal, 14 nömrəli tam orta məktəb isə 1 bürünc medal qazanmışdır.
Bildiyimiz kimi, Ulu Öndər Heydər Əliyevin 100 illik yubileyi ilə əlaqədar 2023-cü il “Heydər Əliyev” ili elan olunmuşdur. “Heydər Əliyev” ili çərçivəsində bütün məktəblərdə tədbirlər, müsabiqələr və açıq dərslər keçirilmişdir.
Elm və Təhsil Nazirliyi tərəfindən keçirilən Ümummilli lider Heydər Əliyevin anadan olmasının 100-cü ildönümünə həsr edilmiş “Ən yaxşı təqdimat” müsabiqəsinin final mərhələsində Sumqayıt şəhəri üzə iştirak edən iki nəfər şagirdimizin hər ikisi 1-ci yerə layiq görülmüşdür. Onlar Təbiət elmləri təmayüllü gimnaziya və 26 nömrəli tam orta məktəbin şagirdləridir.
Şagirdlərimiz həmçinin müxtəlif istiqamətli tədbir, incəsənət idman və intellektual yarışlarda iştirak edərək “Xəmsə Milli İntellektual Oyunu”, “Fövqəladə hallar uşaqların gözü ilə” X respublika uşaq yaradıcılıq müsabiqəsi, “Xəmsə möcüzəsi” I Respublika onlayn incəsənət-festival müsabiqəsi, “Əlaçı” televiziya layihəsində bir sıra nailiyyətlər əldə etmişdirlər.
Təhsildə inkişaf və innovasiyalar üzrə VII qrant müsabiqəsi çərçivəsində isə şəhər üzrə yeddi layihə qalib olmuşdur.
Sonda yüksək bal toplayan məzunlar mükafatlandırılıb
