Gələcəyimiz əmin əllərdədir: Sumqayıtdakı 5 saylı uşaq bağçasından geniş VİDEOREPORTAJ

Müasir təhsilin bünövrəsi və ilkin pilləsi sayılan bağçalar məktəbəqədər yaşda olan uşaqların tərbiyəsi və təhsilə hazırlanması ilə məşğul olan, eyni zamanda, azyaşlıların əyləncə və istirahətini təmin edən müəssisəsidir. Uşaqların düzgün istiqamətdə inkişafının, gündəlik rejimlərinin formalaşma təməli də məhz burada qoyulur. Azyaşlıların intellektual, fiziki və psixoloji inkişafının, potensial imkanlarının üzə çıxarılmasının, şəxsiyyət kimi formalaşmasının, məktəb təliminə hazırlığının, onlarda həyati bacarıqların təşəkkülünün, maddi sərvətlərin insan kapitalına çevrilməsinin təməli, əsasən, məktəbəqədər təhsil müəssisələrində qoyulur. Bu gün uğurla inkişaf edən Azərbaycanın təhsil sektorunda məktəbəqədər təhsil müəssisələri özünəməxsus yer tutur. Abşeron-Xızı Regional Təhsil İdarəsinin tabeliyində fəaliyyət göstərən Sumqayıtdakı məktəbəqədər təhsil müəssisələri isə sözün əsl mənasında gələcəyin layiqli və vətənpərvər gənclərini, ziyalılarını yetişdirmək üçün yorulmadan çalışır. Belə məktəbəqədər təhsil müəssisələrindən biri də, 5 saylı körpələr evi və uşaq baxçasıdır.

Qeyd etmək lazımdır ki, bağçada uşaqların yüksək səviyyədə təlim-tərbiyyə alması, ilkin bilik və vərdişlərə yiyələnməsi, dünyagörüşlü və istedadlı yetişməsi, ən əsası isə dövlətini sevən vətənpərvər gənclər kimi formalaşması üçün hər birşərait yaradılıb. Bağçanın müdiri Könül Yadigarova deyir ki, ölkədə məktəbəqədər təhsil sahəsində vahid proqram mövcuddur. Bağçanın tərbiyəçiləri də öz işlərini həmin proqram əsasında qururlar. Uşaqların gün ərzində əldə etdiyi nailiyyətlər qeyd olunur və gələcəkdə hansı məsələlərə diqqət yetirilməsi nəzərdə tutulur. Eyni zamanda ölkə və beynəlxalq əhəmiyyətli tədbirlərlə bağlı uşaqlara məlumatlar verilir, tədbirlər, məşğələlər hazırlanır."Yaşıl Dünya Naminə Həmrəylik İli" ilə bağlı da bağçada bir sıra maraqlı layihələr həyata keçirilib. Eyni zazmanda bağça qarşıdan gələn "Zəfər Günü"nə xüsusi zövqlə hazırlaşır.

Necə deyərlər, "Sağlam bədəndə, sağlam ruh olar". 5 saylı körpələr evi, uşaq bağçasının rəhbərliyi və bütün kollektivi bu prinsipi əsas tutaraq uşaqların sağlam, keyfiyyətli və təmiz şəraitdə qidalanmasına çox böyük önəm verir.

Məlumat üçün bildirək ki, Azərbaycanda ilk bağça 1907-ci ildə Bayıl qəsəbəsində “Dəcəllər məktəbi” adı ilə yaradılıb. 1916-cı ildə Bakıda Qadın gimnaziyası yanında uşaq bağçası təsis edilib. Bu gün isə iri şəhərlər daxil olmaqla, Azərbaycanın bir çox rayonlarında körpələr evi-uşaq bağçaları  müasir təlim metodlarına uyğun olaraq yüksək səviyyədə fəaliyyət göstərir. Son illərdə demək olar ki, bütün uşaq müəssisələri müasir standartlara cavab verən üslubda yenidən təmir olunub, bir çoxları üçün yeni binalar tikilib, müasir avadanlıq və mebellərlə təmin edilib. Sumqayıtın məktəbəqədər müəssisələri də bu baxımdan xüsusilə seçilir.