Sumqayıtdakı 19 saylı bağça "Zəfər Günü"nü belə qeyd edib - VİDEO

Uşaqların mənəvi inkişafında və şəxsiyyət kimi formalaşmasında təhsilin rolu əvəzolunmazdır. Təhsilin ilk pilləsi sayılan uşaq bağçalarının fəaliyyəti isə bu baxımdan xüsusilə fərqlənir. Məktəbəqədər təhsil ümumi təhsilin əsas həlqələrindən biri sayılır. Bağçalar azyaşlıların həm mənəvi, həm psixoloji, həm də fiziki inkişafına əhəmiyyətli dərəcədə müsbət təsir göstərir. Sumqayıt şəhər 19 saylı körpələr evi, uşaq baxçası sözün əsl mənasında gələcəyin ziyalılarını, elm adamlarını və ən əsası isə şəxsiyyətini formalaşdıran bir müəssisə kimi ön sıralarda yer alıb. Bunu, bağçaya ilk ayaq basan andan görmək mümkündür. Olduqca savadlı və işini bilən pedaqoji kollektiv, nizam-intizamlı tərbiyəçilər bağçada təhsil alan balaca fidanların əsl şəxsiyyətə çevrilməsi, cəmiyyətə layiqli vətəndaşlar kimi formalaşması üçün yorulmadan çalışır. 

Qeyd edək ki, uşağın intellektual səviyyəsi məhz kiçik yaşlarında ona verilən tərbiyə ilə bağlıdır. 19 saylı uşaq bağçasında tərbiyəçi müəllimlərin körpə fidanlarla davranışı, onlara doğma övlad qayğısı ilə yanaşılması gələcəyimizin əmin əllərdə olduğunu deməyə əsas verir. Bundan başqa bağçada uşaqların fiziki, əqli cəhətdən yaxşı inkişaf etməsi, özünə inamlı olması və nitq qabiliyyətinin formalaşması üçün müxtəlif tədris proqramları həyata keçirilir. Müdir Lətafət Ağayeva deyir ki, bağçaya gedən uşaqda artıq məktəb dövründə müəyyən inkişaf özünü göstərir, məktəbə hazır vəziyyətdə gəlir, sisoal fobiyası olmur. Buna görə də bağçanın rolu uşağın həyatında əvəzolunmazdır. Necə deyərlər, "Sağlam bədəndə, sağlam ruh olar". 19 saylı körpələr evi, uşaq bağçasının rəhbərliyi və bütün kollektivi bu prinsipi əsas tutaraq uşaqların sağlam, keyfiyyətli və təmiz şəraitdə qidalanmasına çox böyük önəm verir. Bundan başqa məktəbəqədər təhsil müəssisəsində "Yaşıl Dünya Naminə Həmrəylik İli", "Sumqayıtın 75 illik yubileyi" münasibəıtilə bir sıra maraqlı tədbirlər keçirilib. 

"Zəfər Günü" münasibətilə təşkil olunan tədbir isə öz möhtəşəmliyi ilə sözün əsl mənasında göz oxşayıb. Hərbi geyimli balaca fidanlara elə indidən vətən, torpaq və dövlət sevgisi aşılanır, bu möhtəşəm Zəfəri bizə yaşadan şəhidlərimiz və qazilərimiz onlara tanıdılır. Tədbirdə bağçanın pedaqoji kollektivi ilə yanaşı, Şəhid Rüfət Mustafayevin anası Afət Mustafayeva və şəhid Səbuhi Həsənquliyevin anası Mayisə Həsənquliyeva da iştirak edib. 

Azərbaycanın dövlət himinin səsləndirilməsindən sonra 19 saylı bağçanın balaca fidanlarının vətənpərvər ruhda hazırladıqları şerilər, rəqslər və səhnəciklər təqdim olunub. 

"Zəfər Günü" tədbirindən çıxış edən şəhid anası Mayisə Həsənquliyeva bildirib ki, Müzəffər Ali Baş Komandan İlham Əliyevin rəhbərliyi ilə 44 günlük Vətən Müharibəsində qəhrəman oğullarımız düşməndən intiqam alaraq, 30 il həsrətində olduğumuz Qarabağ torpaqlarında Azərbaycan Bayrağını dalğalandırdılar. Mayisə Həsənquliyeva səsləndirdiyi şeirlə tədbir iştirakçılarına təsirli anlar yaşadıb. 

Qeyd edək ki, son illərdə demək olar ki, bütün uşaq müəssisələri müasir standartlara cavab verən üslubda yenidən təmir olunub, bir çoxları üçün yeni binalar tikilib, müasir avadanlıq və mebellərlə təmin edilib. Sumqayıtın məktəbəqədər müəssisələri də bu baxımdan xüsusilə seçilir.