Pakistanın Lahor şəhər polisi 20 yaşlı Azərbaycan vətəndaşının qrup şəklində zorlanması ilə bağlı müraciəti əsasında cinayət işi açıb. Hüquq-mühafizə orqanları üç şübhəlinin şəxsiyyətini müəyyənləşdirib və onların saxlanılması istiqamətində əməliyyat keçirir. Bu barədə yüksək vəzifəli polis əməkdaşı məlumat verib.
Pakistan mediasının məlumatına görə, özünü Diana kimi təqdim edən qadın təxminən iki həftə əvvəl biznes məqsədilə Pakistana gəlib. Hadisədən sonra o, yoldan keçən şəxsin telefonundan istifadə edərək polisə müraciət edib.
Müraciətdə bildirilir ki, iki naməlum qadın onu üç kişinin olduğu kafeyə aparıb. Daha sonra, iddiaya görə, qadını bir mənzilə aparıblar və orada ona sərxoşedici maddə olan içki verilib. Şikayətçinin sözlərinə görə, bundan sonra üç kişi ona qarşı seksual zorakılıq törədib.
Qadın polisə həmçinin bildirib ki, hücumdan sonra onu hava limanının yaxınlığında qoyublar. Onun sözlərinə görə, “iPhone” telefonu və daha bir bahalı mobil telefonu oğurlanıb.
Polisin istintaq üzrə baş inspektor müavini Seyid Zişan Raza Arab News-a bildirib ki, hüquq-mühafizə orqanları bütün şübhəlilərin şəxsiyyətini müəyyən edib və cinayətin törədilməsi zamanı istifadə edildiyi ehtimal olunan avtomobili müsadirə edib.
“Bütün təqsirləndirilən şəxslərin kimliyini müəyyən etmişik. Cinayətdə istifadə olunan nəqliyyat vasitəsi müsadirə edilib”, — deyə o bildirib.
Polis hələlik şübhəlilərin adlarını açıqlamır. Rəsminin sözlərinə görə, istintaq hüquq-mühafizə orqanlarının rəhbərliyinin nəzarəti altında davam etdirilir.
