Heydər Əliyev elm və təhsilin inkişafına böyük qayğı ilə yanaşırdı. Xeyirxah, vətənpərvər, yaradıcı, millətini hər şeydən uca tutmağı bacaran, həyatının hər anı xalqının taleyinə bağlı olan dahi insanlar haqqında heç vaxt keçmiş zamanda danışmırlar, sadəcə - dünyasını dəyişdi - deyirlər. Həm də bu cür adamların bioloji yoxluğu onların mənəvi varlığı ilə əvəzlənir. Yəni belə insanlar bizi tərk etdiyi anda, başqa bir formada mənəvi cəhətdən hər zaman bizimlədir. Azərbaycan xalqının ümummilli lideri Heydər Əliyev də xalqın böyük mənəvi dəyərinə, ümid və and yerinə çevrilməklə əbədiyyətə qovuşdu. Bu gün Azərbaycan Təhsili deyəndə Heydər Əliyev yada düşür. Çünki bu müasir sistemin əsasını Ulu Öndər qoyub. Hazırda bu proses onun layiqli davamçısı Prezident İlham Əliyev tərəfindən uğurla davam etdirilir.
Den.az xəbər verir ki, bu sözlər Abşeron-Xızı Regional Təhsil idarəsinin tabeliyində olan Xırdalan şəhər 3 nömrəli məktəb liseydə Heydər Əliyevin 100 illiyi ilə əlaqədar təşkil edilən açıq dərsdə səsləndirilib.
Bildirilib ki, Günümüzün reallıqları sübut edir ki, hazırda ölkə Prezidenti cənab İlham Əliyev tərəfindən bu istiqamətdə aparılan işlər Azərbaycan xalqının xoş gələcəyinə xidmət edəcək səviyyədə uğurla davam etdirilir. Eyni zamanda, bütün bunlar elm adamlarının daha da fəallaşmasını, ölkədə həyata keçirilən islahatların elmi əsaslarının işlənib hazırlanmasında xüsusi fəallıq göstərilməsini tələb edir. Açıq dərsdə müəllim və şagirdlərin Heydər Əliyev və Azərbaycan təhsili mövzusunda fikirləri dinlənilib.
