Uğurlu təhsilin açarı... - 6 saylı tam orta məktəbdə nələrə şahidlik etdik? - VİDEO

"Təhsil hər bir dövlətin, ölkənin, cəmiyyətin həyatının, fəaliyyətinin mühüm bir sahəsidir". Müasir Azərbaycanın qurucusu, Ulu Öndər Heydər Əliyev bütün fəaliyyəti dövründə təhsilə bu cür yüksək dəyər verib. Aydındır ki, sağlam gələcəyin formalaşmasında təhsil sistemi olduqca böyük rola malikdir. Bu baxımdan Sumqayıt məktəbləri də ölkənin təhsil sahəsinin inkişafına çox böyük töhfələr verib və proses indi də davam etməkdədir.

Sumqayıt şəhər Hacı Zeynalabdin Tağıyev qəsəbəsində yerləşən 6 saylı tam orta məktəbdə çəkiliş apararkən bir daha bunun şahidi olduq. Məktəbə daxil olarkən elə foyedə rastlaşdığımız və bir -birini əvəzləyən fotoguşələrə baxdıqca burada təhsilə necə önəm verildiyini gördük. Belə ki, Ulu Öndər Heydər Əliyevin, Prezident İlham Əliyevin və şəhidlərimizin fotolarını əks etdirən plakatlarla yanaşı məktəbdə həm də Hacı Zeynalabdin Tağıyevin həyatınının müxtəlif dönəmlərini əks etdirən guşələrin yaradılması təhsil ocağında tariximizə necə dəyər verildiyinin göstəricisi hesab oluna bilər. Siniflərdə çəkiliş apararkən dərs davamiyyətinin yerində olması, müəllimlərin aktivliyi gözümüzdən yayınmadı.

1972-ci ildən fəaliyyət göstərən 6 saylı məktəbdə yüksək keyfiyyətli təhsil üçün hər cür şərait yaradılıb. Məktəb iki növbədə fəaliyyət göstərir və 1825 şagird 67 sinifdə təhsil alır. Bundan başqa təhsil ocağında 5 məktəbəqədər hazırlıq qrupu, 1 peşə təmayüllü sinif və 1 icma əsaslı məktəbəqədər təhsil qrupu fəaliyyət göstərir.

Adıçəkilən məktəb təhsildə öndə olmaqla yanaşı həm də şəhərin ictimai həyatında, əlamətdar günlərdə də bir sıra maraqlı tədbirlərlə yadda qalıb. Belə ki, il ərzində təhsil müəssisəsində ümummillli lider Heydər Əliyevin 100 illiyinə və "Qələbə Günü"nə həsr olunan maraqlı tədbirlər keçirilib.

Məlumat üçün bildirək ki, ötən il məktəbin 3 şagirdi məntiq olimpiadasında, 2 nəfər isə fənn müsabiqəsində şəhər mərhələsinə çıxıb. Onlar arasında hətta yarımfinal mərhələsinə qədər irəliləyən şagirdlər də olub. Respublika fənn olimpiadasında isə məktəbin 9 şagirdi şəhər mərhələsinə keçə bilib. Bütün bu uğurlarla yanaşı ötən il 6 saylı məktəbin 93 məzunun 66-sı ali məktəbə sənəd verib. Onlardan 48 nəfər şagird yüksək nəticələrlə müxtəlif universitetlərə qəbul olunub.