Bu məktəbdə 14 Fevral Günü şagirdlər bir-birinə : MARAQLI AKSİYA-VİDEO

Hər kitab bir dünyadır. Bu dünyanın içinə daxil olan böyükdən-kiçiyə hər kəs kitabın sehrinə düşür və ondan ayrıla bilmir. Kitab həm də elm və bilik mənbəyidir. Müasir dünyada elm və texnikanın sürətli inkişafı elektron və PDF formada oxu qabiliyyətini artırsa da, ənənəvi kitabçılığı və kitaba məhəbbəti sıradan çıxara bilməyib. Elə buna görədir ki, hər il dünyada 14 fevral Beynəlxalq kitab bağışlama günü kimi qeyd olunur. Bu münasibətlə dünyanın bir çox ölkələrində maraqlı aksiyalar və tədbirlər keçirilir. Sözsüz ki, elm və biliyə hər zaman xüsusi önəm verən, dünyaya alimlər, ziyalılar bəxş edən, bir sözlə, kitab sevgisini qəlbində daşıyan Azərbaycan cəmiyyətində də Beynəlxalq kitab bağışlama günü özünəməxsus şəkildə qeyd olunur. Bu dəfə isə maraqlı aksiya Abşeron-Xızı Regional Təhsil İdarəsinin tabeliyində fəaliyyət göstərən Sumqayıt şəhər 10 nömrəli tam orta məktəbində keçirilib. Öncə qeyd edək ki, adıçəkilən təhsil ocağı öz şagirdlərinin təlim-tərbiyəsi və təhsil metodikası ilə xüsusilə seçilir. Məktəb 1956-cı ildən fəaliyyət göstərir və 74 müəllim heyəti 1010 şagird kontingentinin gələcəyin savadlı kadrı kimi yetişməsi üçün əzmlə çalışır. Direktor Səmra Quluzadənin rəhbərliyi altında həyata keçirilən tədbirlər təhsil ocağının bir sıra uöğurlara imza atması ilə nəticələnib. Bu uğurlar indi də davam edir. Hər zaman maraqlı və fərqli konsepsiya ilə seçilən 10 nömrəli tam orta məktəb Beynəlxalq Kitab bağışlama günü münasibətilə də maraqlı aksiya keçirib. Belə ki, bütün sinif otaqlarında mini kitabxana yaradılıb, ucqar kənd məktəblərinə göndərmək üçün kitablar hazırlanıb. Bundan başqa şagirdlər tərəfindən bir sinifdə Beynəlxalq kitab bağışlama günü münasibəti ilə maraqlı səhnəcik hazırlanıb və təqdim edilib. Azərbaycanın məşhur "Sehirli Xalat" filmindən kiçik bir epizodu özündə ehtiva edən səhnəcikdə kitabların dili ilə danışıq əks olunub. Belə ki, çoxlu kitab oxuyan insanlarda hətta kitabların dili ilə danışmaq bacarığı formalaşdığı səhnəciyin əsas məqsədini təşkil edib. Məktəbin şagirdləri məhz bu epizodu yüksək peşəkarlıqla canlandırıblar. Təhsil ocağında həmçinin siniflərdən biri tərəfindən məktəb kitabxanasına vəsait toplanıb, eləcə də kitabxanada şagirdlərə kiçik hədiyyələr təqdim olunub. Məlumat üçün bildirək ki, Abşeron-Xızı Regional Təhsil İdarəsinin tabeliyində fəaliyyət göstərərn bütün təhsil müəssisələrində elm və biliyi təbliğ edən, şagirdləri maarifləndirən və onların dünyagörüşünü artıran bu cür aksiyalar mütəmadı olaraq keçirilir. Beynəlxalq kitab bağışlama günü isə uşaqlara kitab bağışlayan və onlarda kitaba məhəbbət yaradan bütün insanları birləşdirir. 2012-ci ildən qeyd edilən bu bayram ABŞ-da məşhur uşaq kitabı saytının yaradıcısı Emmi Brodmoorun adı ilə bağlıdır. Hər il minlərlə həm oxunmuş, həm də yeni kitablar dünyanın bütün istiqamətlərinə yola düşür və uşaqlarda kitaba məhəbbət, böyüklərdə isə bağışlamaq, hədiyyə etmək sevinci yaradır.