İlk müəllim-gələcək nəsilə elm qapısının açarını təqdim edən, onların saf mənəviyyatına, hisslər, duyğular aləminə yeni-yeni lövhələr gətirən və heç zaman unudulmayan bir şəxsiyyətdir. Məktəb partası arxasında keçən illərdə ilk müəllimlərimiz bizə qətrə-qətrə Vətənə, torpağa sevgi hissini aşılayırlar. Bizə əlimizdə ilk dəfə qələm tutub "Ana", "Vətən" sözünü yazmağı öyrədir ilk müəllimlərimiz.
Orta təhsilin ilkin mərhələsi olan ibtidai sinif pilləsini bitirmək münasibətilə bu gün ümumitəhsil müəssisələrində tədbirlər təşkil edilir.
"Den.az" xəbər verir ki, Abşeron-Xızı Regional Təhsil İdarəsinin tabeliyində fəaliyyət göstərən Məmmədli kənd tam orta məktəbinin 4c sinif şagirdlərinin “Əlvida ilk müəllimim” adlı buraxılış günü keçirilib.
Tədbirdə şagirdlər müəllimə,Vətənə aid şeirlər söyləyiblər. 4 il ərzində keçirdikləri tədbirlərdən və Azərbaycanın film səhnələrindən maraqlı epizodlar nümayiş etdiriblər.
Uşaqlar bu illər ərzində onlara həm müəllim, həm də ana qayğısı ilə yanaşan ilk müəllimlərinə həsr etdikləri mahnı və musiqi nömrələrini səsləndiriblər.Tədbir zamanı duyğulu və kövrək anlar yaşanıb.
Öz sevimli şagirdlərinə vida sözü ilə müraciət edən 4c sinifinin rəhbəri Yeganə Şərifova 4 il əziyyətini çəkdiyi uşaqlardan ayrılmağın onun üçün çox çətin olduğunu dilə gətirib. Müəllim şagirdlərinə gələcək təhsil illərində uğurlar diləyib, Vətənə, torpağa layiqli vətəndaş kimi yetişmələrini arzulayıb. Eləcədə gələcəkdə şagirdlərini Respublikanın ən yüksək Ali təhsil ocaqlarında görmək arzusunu qeyd edib.
4c sinfinin şagirdlərinə ana qayğısı göstərən müəllimin sevincinə məktəb direktoru və gələn qonaqlar da qoşulublar. Çıxış edən sözügedən məktəbin direktoru Könül Hüseynova Yeganə Şərifovanın bu təhsil ocağının daim sağlam bünövrəsi, dayanıqlı sütunu olduğunu bildirib. Məhz onun və digər ibtidai sinif müəllimlərinin səyi nəticəsində məktəbin öncül təhsil ocaqları sırasında olduğunu qeyd edən Könül Hüseynova şagirdləri təbrik edib və onlara uğurlar arzulayıb.
Daha sonra Məmmədli kənd 10 nömrəli körpələr evi-uşaq bağçasının müdiri Vəfa Rəsulova tədbiri yüksək qiymətləndirib. Vəfa Rəsulova müəllimə və şagirdlərə uğurlar arzulayıb.
Sonda xatirə şəkli çəkdirilib.
Şahnaz Əliyeva
Den.az