Braziliyanın Paraiba ştatında çoxsaylı qətllərlə əlaqəli olduğu üçün axtarışda olan 33 yaşlı Jorlan Alves da Silva hüquq-mühafizə orqanlarının keçirdiyi əməliyyat nəticəsində saxlanılıb.
Polisdən gizlənməyə çalışan şübhəlinin saxlanıldığı andakı görünüşü diqqət çəkib. Bildirilir ki, Silva qadın paltarı geyinib, uzun qara parik taxıb, qadın sandallarından və gün eynəyindən istifadə edib, həmçinin dırnaqlarını boyayıb. Polis onun bu yolla kimliyini gizlədərək ərazidən qaçmağa çalışdığını ehtimal edir.
Silva saxlanılarkən qucağında təxminən 2 yaşlı uşaq da olub. Polis uşağın şübhəlinin qohumu olmadığını bildirib. Tibbi müayinədən keçirilən uşağın vəziyyətinin yaxşı olduğu açıqlanıb. Uşağın Silvanın yanında necə peyda olması isə araşdırılır.
Braziliya mətbuatının məlumatına görə, Silva mayın sonunda həbsxanadan çıxdıqdan sonra təxminən üç ay ərzində törədilmiş 16 qətllə əlaqəli olmaqda şübhəli bilinir. Qətllərin böyük hissəsinin Paraibadakı Vale do Mamanguape bölgəsində törədildiyi bildirilir. Polis bəzi qətllərlə Silva arasında əlaqəyə dair texniki sübutların olduğunu qeyd edib.
Şübhəlinin dindirilmə zamanı verdiyi ifadə isə istintaqın miqyasını daha da genişləndirib. Bildirilir ki, Silva həyatı boyu təxminən 80 nəfəri öldürdüyünü iddia edib. O, ilk qətlini 13 yaşında törətdiyini də söyləyib.
Lakin polis 80 qətllə bağlı iddianın hələ təsdiqlənmədiyini və hər bir hadisənin ayrıca araşdırıldığını vurğulayıb.
Araşdırılan cinayət işləri arasında avqustun 1-də Rio Tintoda iki iş adamının öldürülməsi də var. Səlahiyyətlilərin məlumatına görə, Silva araşdırmalardan biri çərçivəsində öldürülən şəxslərdən birinin basdırıldığı yeri polisə göstərib. Bu məlumat onun keçmişdə açılmamış qətllərlə mümkün əlaqəsinin də araşdırılmasına səbəb olub.
Braziliya polisi hazırda Silvanın dindirilmə zamanı irəli sürdüyü təxminən 80 qətl iddiasının həqiqətə uyğun olub-olmadığını müəyyənləşdirməyə çalışır. Səlahiyyətlilər təsdiqlənmiş faktlarla şübhəlinin öz iddialarının bir-birindən ayrılmasının vacibliyini bildirirlər. Araşdırma müxtəlif istiqamətlər üzrə davam etdirilir.
